4:36 ص

انت والمطبخ ورمضان

انت والمطبخ ورمضان




السلام عليكم ورحمة الله وبركاته

رمضان كريم عليكم وعلينا اللهم امين

وينعاد علينا وعلي الامه الاسلاميه باليمن والبركات يارب

طبعا كلنا عارفين انه شهر الطاعات

والكنافه والقطايف والمحمر والمشمر

وعشان كده مش بنلحق ندي للشهر حقه

وهو شهر واحد في السنه كلها

عشان كده ايه رايكم نشوف شوية افكار نوفر بيها وقت ومجهود في الشهر ده عشان نستثمره صح يعني مطبخ طول
النهار وقيام طول الليل مش هينفع خالص

فياريت اللي عنده أي فكره ميبخلش علينا واهو كلنا نستفيد

مثلا بالنسبه للاكل وتحضير الفطار

نحاول نشوف ايه الحاجه اللي بنحتاجها كل يوم

- مثلا الرز يتنقي ويتنضف ويكون علي الاستخدام علي طول
- الخضار فيه ناس كتيره بتخزنه عشان تستخدمه في غير اوانه زي البسله مثلا وغيرها لو عندنا فعلا ده كده هنكون وفرنا حاجه من المجهود لانها هتكون جاهزه
- لو باميه تبقي متقمعه وجاهزه علي الطبخ علي طول
- مثلا القلقاس ده اوانه مش هيكون جاهز بس ممكن نجهز خلطة الخضار بتاعته ونحطها في الفريزر ووقت الطبخ تكون جاهزه علي طول
- ومفيش مانع اننا نطهي الصلصه ونحطها بالفريزر ودي بتنفع جدا في بعض الاكلات الصعبه خصوووصا المحاشي اللي بتاخد وقت كبير في التحضير
- بالنسبه للحوم سواء فراخ او لحم بقري او مفروم مفيش مشكله خالص اننا نحطه في الفريزر طبعا ده بكميات معقوله علي حسب استخدامنا
- لو بتعملي كفته كتير بيكون مريح جدا لو عملتيها وصبعتيها وحفظتيها في اطباق فايبر في الفريزر ويادوب علي التحمير وخصوصا انه معظم الناس بتحب النواشف في رمضان
- لو علي المخللات كتير بيفضلو انهم يخللوا الحاجات اللي بيحبوها قبل رمضان بفتره وده بيكون افضل وانظف واوفر

والاهم واللي مش لازم ننساه ابدا اننا نستخدم كل حاجه بكميات معقوله ودايما نفتكر انه في ناس تانيه في مجاعات
فالنعمه اللي ربنا رزقنا بيها المفروض نستخدمها بعقل وحكمه
يعني نطبخ الحاجه علي اد طاقتنا ومش لازم نرمي كل يوم حلل مليانه من خيرات ربنا لانه في الصيام محدش بيفضل
البايت لو الاكل زاد علينا نصرفه في ساعتها علي طول لحد محتاج ممكن ميكنش فطر كويس يتعشي بيه مش نستني
لتاني يوم لان فيه اكلات لو باتت مش هتكون حلوة

طيب لو عندي اكل بايت مش هرميه بس عايزه اجدد فيه اعمل ايه ؟؟

فيه بعض الاكلات ممكن نتصرف في تحويلها لاكله جديده طيب زي ايه

مثلا السمك

اكلة السمك لو باتت مش بتكون ظريفه ابدا وخصوصا بئه لو مشوي
طيب دا اللي اتبقي كان كتير خساره ارميه ؟
طبعا لا ناخد السمك ونقشره ونفصصه واخد كل اللحمه بتاعته واضيف عليها توابل ملح وفلفل وكمون وكزبره واقطع
عليها بقدونس اخضر مع فصين توم وبصله وثمرتين بطاطس مسلوقه واهرسها كويس جدا
وبعدين اصبعها زي الكفته تمام واقليها بالبيض والبقسماط وتتاكل مع طحينه ولا بابا غنوج تبئي تحفه

كده بئه عندي اكله لذيذه خالص كفتة السمك واعمل جمبها رز احمر بالبصل والتوابل وبئت اكله في منتهي اللذه ومش رمينا حاجه


طيب لو اللي بات عند لحوم هقول برضه مش مشكله خالص
سواء كانت لحمة او فراخ او بط حتي لما بتبات طعمها مش بيكون لذيذ ممكن اخدها وافصصها نساير صغيره وبعدين
اقطع فلفل اخضر وقطع طماطم وبصل اشوحها في شوية زيت ولما يدبلو شويه احط عليهم ملح وفلفل وبهارات وشعرة
قرفه مطحونه وجوزة الطيب وبعدين اضيف عليها اللحم المقطع واسيبها شويه علي النار لما تاخد من بعضها وارفعها

وادي اكله تانيه مع طحينه برضه بتتغمس بتكون لذيذه جدا نحمر جمبها بطاطس ولا حاجه او شوية ملوخيه

الجميل فعلا انك مش بترمي حاجه ومش بتاخد منك وقت خالص غير الطعم الذيذ

لكن فيه اكلات مينفعش معاها تغيير دي بئه بنصح انه قبل ما نصلي العشا نكون اتصرفنا فيها منها مش هتبات ومنها حد تاني يكون انتفع

طيب بالنسبه للحلويات نعمل ايه

الحلويات لو باتت مش هيجري لها حاجه بس ممكن تنشف شويه و يزهئوا منها مثلا :

القطايف:


لما تبات بتطري ومش بتكون لذيذه اما لو محشه كريمه لا يفضل انها تبات اصلا لذلك ياريت لو هنعمل قطايف نعمل علي
اد استخدامنا اليومي فقط لا غير ولو مش عندك وقت تعمليها كل يوم ممكن تحشيها كلها وتعملي نصها انهارده وتحطي
الباقي في طبق في الفريزر بس لازم تستخدميه تاني يوم لانه مش بيعد كتر من كده

الكنافه :

عادي بتعد ومفيش مشكله بس لو بالكريمه مش هتستحمل اما لو بالمكسرات هتعد بس هتنشف طيب الحل ايه . انا اقولك
ممكن تجيبي لبن وتغليه وعند التقديم تحطي كل خارطه في طبق وتحطي عليها اللبن المغلي بيكون طعمها لذيييييذ جدا جدا
طيب لو حد مش بيحب اللبن او الطريقه دي تقيله عليه
هقوله في طريقه تانيه : هاتي الكنافه الباقيه اللي عملتيها ومحدش راضي يكلها غالبا بتكون نشفت من العسل اللي عليها
هاتيها كسريها خالص يعني فتفتيها ومتكونش خرط وبعدين في بخاخه حطي فيها لبن وبخي اللبن عليها عشان تطري لو
فيها عسل كفايه خلاص لو عسلها قليل حطي شويه عليها كمان عشان تطري لو سمنتها كتيره مش تحطي تاني لو قليله
حطي معلقه ولا حاجه وعلي النار هاديه قلبها كلها وبعدين اما تسخن كده كبسيها في قوالب الجيلي الالمونيوم دي اللي
بيكون فيها اشكال في قاعها وبعدين اقلبيها في طبق وقدميها طبعا بيكون فيها مكسراتها لو حابه تضيفي كمان انتي وزوقك

بس فعلا بيكون طعمها جميييييل

اما بالنسبه للعصاير بئه فياريت نستخدم العصاير الطبيعيه بتكون مفيده جدا لجسم زي التمر هندي والخروب والكركديه
ماليش دعوة بالعرق سوس ^_^وماشي مفيش مانع من قمر الدين والجوافه والمانجه
والعصاير دي تحديدا مش هتكلم فيها انها اكيييد بتخلص لانه الواحد بيكون محتاج حاجه تساعده علي مواصلة الصلاه
والقيام ومش بتكون تقيله ولا حاجه بس ناخد بالنا من السكر اهم حاجه

الخشاف والتمر والكلام ده انا بنصح انه اليوم اللي نعمل فيه خشاف بلاش حلويات والعكس .
لان لو الاتنين مع بعض هيكون كتير اوي صحيا ونفسيا وماديا ^_^


ياجماعه والله السكريات دي اكبر غلط علينا ياريت ناخد بالنا هي البطن هتاخد ايه ولا ايه بس

ومننساش نفطر علي التمر سنه

واخير ا لا ننسي شهر رمضان في الاصل شهر الطاعات

لي عوده تانيه ان شاء الله في الاستعدادات للعيد والعشر ايام الاواخر اللي بتضيع فيها

في انتظار تعليقاتكم

1 التعليقات:

مستكه يقول...

مرسلة بواسطة مستكه في 12:51 ص
20 التعليقات:

مستكه يقول...

وش بيشد في شعره حبهااانه الحئيني يا اختي كل ما اظبط السطور الاقيها داخله في بعضها عااااااااااااااااااا
03 سبتمبر, 2008 01:54 ص
إنترنتاوي يقول...

حاجة حلوه جدا و تجري الريق
03 سبتمبر, 2008 02:31 ص
الفقيرة إلى الله أم البنات يقول...

بلاش عاااا دى برافو عليك بوست جميل تسلم إيدك يا متكه يا حبيبتى ايه الشغل إللى على ميه بيضه ده يا سلام صحيح المشرفين مشرفين حتى ولو اعتزلوا مش أى حد يعمل بوستات
03 سبتمبر, 2008 03:36 ص
bigera يقول...

طاب والشباب بس اللى مش عارف يطبخ فى الغربة يعمل ايه .... باجيرا من حارة زعتر ....
04 سبتمبر, 2008 10:58 م
bigera يقول...

طاب والشباب بس اللى مش عارف يطبخ فى الغربة يعمل ايه .... باجيرا من حارة زعتر ....
04 سبتمبر, 2008 11:00 م
مستكه يقول...

انتر نتاوي اهلا وسهلا بيك نورت يا فندم ياريت تشرفنا علي طول ان شاء الله تجد ما يسرك وبمناسبة الزياره الاولي لك طبق اي حتة بيتزا من البوست اللي فات
04 سبتمبر, 2008 11:06 م
مستكه يقول...

ام البناااات طبعا انتي صحبة بيت وكون البوست عجبك ده في حد ذاته شهاده اعتز بها جدااااااااا والله لا تتخيلي مدي فرحتي بوجودك وكلامك ده ربنا يخليكي لينا دايما وما يحرمنا منك بس هو يعني مفيش اي ملاحظات كده لازم استغل وجود خبرة زيك في الموضوع ^_^
04 سبتمبر, 2008 11:09 م
مستكه يقول...

باجيرا اهلا بزعتر واهل زعتر حللت اهلا ونزلت سهلا نورت المدونه والله اسعدني مرورك بالنسبه بئه للشباب المغترب خصوووصا في رمضان فنصيحتي انهم علي المطاعم معتدل ماااارش او عليك والتيك اواي لانه تجربة الطبخ في الصيام وخصوصا في حالتك هتكون مؤلمه يعني لو مفيش خبره اصلا يبئي كل سنه وانت طيب ابئي اتمرن بئه في الايام العاديه ميكونش فيها صيام ولا انت مستعد تصوم طول اليوم تطوع وطول الليل مجبر ^_^
04 سبتمبر, 2008 11:13 م
نفرتيتي يقول...

مستكة بجد مالكييش حل ما شاء الله عليكي موضوع تحفة بجد وحشتيني يا بنتي ولا رمضان هايخدك مننا ايوة يا عم يا بخت اللي بياكل من ايديك تسلم ايدك يا قمر انا اخدت البوست كوبي سلام
10 سبتمبر, 2008 06:04 م
Wael يقول...

موضوع كويس وفيه مجهود واضح حتى فى العنوان فكرنى بفيلم انتى وليلى والذئب حاجه كدة ... برافو يا اخت مستكه والله موضوع ممتاز ..قريته كله رغم ان ماليش فى البنتجان المطبخى دة لكن عجبنى طريقه استثمار الوقت و وجود حل لكل نوع من انواع الطبيخ واللحوم والحلويات بس فى طريقه الكنافه اللى نشفت ومش بنحبها باللبن انا حسيت اننا بنعذب الكنافه وشويه وهتطلع تقولنا احد احد يعنى كسريها وفتفتيها وقطعيها وبعدين اكبسيها !! مش كدة يبقى افترا يا اخت مستكه ؟؟ انتوا ادرى بقى فتكوا بعافيه
13 سبتمبر, 2008 12:36 م
راندا رأفت يقول...

شغلكوا حلو قوي في رمضان يا مستكة وحبهان كل سنة وانتوا طيبين وفي المدونة مبدعين
13 سبتمبر, 2008 10:43 م
مستكه يقول...

نيفرتيتي حبيبتي يا رافعه معدنياتي بس مش عارفه ليه حاسه انك فاهماني غلط ماهو مش معقول انتي الوحيده اللي هتقولي يابخت اللي بياكلو من ايدك فين ماما تسمعك عشان تقدر النعمه اللي بين ايديها يلا يا بنتي هما العظماء كده دايما محدش بيقدرهم في الاول ^_^ نورتي البوست يا جميل
14 سبتمبر, 2008 02:24 ص
مستكه يقول...

اهلا بيك يا بشمهندس احنا لازم ندبح انهارده طبعا انا مجتش جمب الرز باللبن لاني عارفه انه مبيستنااااش بالنسبه للكونافه مش عايزاها تصعب عليك خالص دا احنا بنعد 11 شهر في السنه يمكن ناكلها مره ولا اتنين ونيجي في رمضان ناكلها كل يوم لما زرعنا من الكونافه وهفضل ادور علي طرق كتيره لاعادة تدوير الكونافه حتي تصرخ وتستغيث نيااااهاهاههاها ضحكه شريره
14 سبتمبر, 2008 02:30 ص
مستكه يقول...

راندا مالانهايه هنا شخصيا رنووود وحشاني يا جميل والله مش نورتي المدونه بس لا نورتي لحد الكوبري كده وانتي جايه وحته من التقسيم من عندي يلا ان شاله ماحد حوش فينك يا حجه مش عايزه تشوفيني انا ورانيا رضوان والشله ما تيجي نتقابل
14 سبتمبر, 2008 02:32 ص
Wael يقول...

انتى لسه هتبحثى على طرق تعذبى بيها الكنافه اكتر من كدة .. تصدقى رغم عدم الاستظراف اللى بينى وبين الكنافه الا انها صعبت عليا والدموع قربت تفر من عينى ع الافترا بتاعك ده.. وبتقولي لازم ندبح النهاردة ؟؟ مش مكفيكى كل اللى عملتيه كمان دم انا هسميكى مستكه .. قاهرة الكنافه ,,,,,,,,,, اوعى تيجى جنب الرز بلبن الله لايسيئك الرز بلبن غلاوته عندى من غلاوة نسمه بنتى
16 سبتمبر, 2008 03:49 م
راندا رأفت يقول...

انتي كمان يامستكاية وحشاني جدا جدا والله ياريت نتقابل زي زمان نفسي اشوفكم كلكم
17 سبتمبر, 2008 12:22 ص
مستكه يقول...

بشمهندس وائل لسه مخلصتش من الكيكه هتوقعني في الكونافه الله يكرمك انسي لابهدلك الرز بلبن وام علي والسنامون والتشيز كيك وممكن ندخل علي المحاشي ما بلااااااش
17 سبتمبر, 2008 12:37 ص
مستكه يقول...

راندا بااااشا خلاص اتفقنا بعد العيد بمشيئة الرحمن نرتب لقاء انتو وحشني جدا والله وكنت عايزه اعرف لو بتروحي books and beens ولا لا
17 سبتمبر, 2008 12:42 ص
Dr.Soha Adel يقول...

بجد افكار جميله انا بحب البنت الشاطره كده
05 أكتوبر, 2008 05:59 ص
مستكه يقول...

والله انتي اللي جميله يا سهي شفتيني وانا شاطره ^_^ مره من نفسي ههههههههههههه
29 نوفمبر, 2008 08:11 م