١٠:٥٩ م

من كــل بــلــد فــئــعــة





ياجماله يا جماله


بحبك اوي اوي اوي يا شيف


انت معلم والباقي سلطه


ممكن اهداء !!


متستغربوش دي مش رساله غراميه


ولا رسالة اعجاب باحد النجوم او لاعبي الكوره الساحره


دي حاجه بسيطه من اللي بنسمعه يوميا في برنامج " من كل بلد أكله "


هذا البرنامج الذي ذاع صيته واشتهر كالنار في الهشيم


لا اشكك ابدا في قدرات القائمين عليه ولا مدي الاستفاده اللي حطت منه علي كل بيت


ولكن


البرنامج ده لتعلم الطهي يعني المفروض مداخلات المشاهدين استفسارات عن الاكلات المختلفه وطرقها


وما لايستطيع عقلي استيعابه ان تتصل سيده فاضله لتقول للشيف فلان بحبك اوي يا شيف


او وحشني يا شيف !!!!


او ان ترسل اخري اهداء بمناسبة خطوبة زوج بنت خالة عمة جوز بنتها !


برنامج اكل ولا ما يطلبه المستمعون !!


ما صدقنا تخلي عن البرنامج المذيع الشهير ذو الطلة البهيه والطلعه النديه


فكنا نتعذب طوال ساعه كامله بهذه الطله مكتفيين بتعلم الوصفات شفويا من الشيفات


وعندما علمنا انه حط برحاله الي محطه اخري وحمدنا الله علي هذه النعمه


تولي الرايه منه الشيف فلان الذي اذا تجرأت احد المشاهدات وقالت انها لم تشاهد حلقته


فتحت علي نفسها ابواب من سم البدن والبستفه


وفي الاخر احنا تحت امرك يافندم


يا سبحان الله !


للمره الثانيه لا انكر نجاح البرنامج وتميزه عن غيره في دقة الوصفات


لكنه يحتاج لاسلوب جيد افضل من هذا


ويأتي هنا السؤال ( ركزوا بئه عشان فيه جوايز ) اختر الاجابه المناسبه :


هل العيب في ....

- عم محمد الفكهاني اللي علي ناصية الشارع


- مقدمي البرنامج


- عامل السويتش


- المشاهدين


- العيب في السيستم


- العيب لو طلع من اهل العيب ميبقاش عيب


- تونس


منتظره ايجابتكم وايميلاتكم علي ص ب 408 صفط اللبن بيت ام رشا ورا قهوة بعجر





بفكر في توكيل مرارت من الصين


مش هنلاحق فئع مرارات من مسلسلات ولا برامج ولا اعلانات ولا قرارت وقوانين


بيتهيالي اسيبني من الطبيخ واخليني في مشروع المرارات ده اضمن !


١٠:٤٩ م

الــعــزيــزيــة

السلام عليكم ورحمة الله وبركاته
هنعمل انهارده نوع حلو طعمه لذيذ جدا
طريقته سهله ومضمونه ان شاء الله
المقادير :
- كوب مكرونه ( اي نوع )
- 1 كيلو لبن
- كوب سكر
- فانيليا
- 2 بيضه
- 2 ملعقة نشا او كاستر
الطريقه :
- تسلق المكرونه جيدا (بدون ملح ) ثم تصفي وتضرب في الخلاط مع اللبن والسكر جيد جدا
حتي تختفي المكرونه تماما وحتي لا تكون مخرزه ( وياريت لو نصفي الخليط بالمصفي عشان لو فيه اثر للمكرونه يزول )
نضع الخليط في اناء ثم نضرب البيض + الكاستر + باقي كيلو اللبن ( لاننا لانضع اللبن كله مع المكرونه )في الخلاط
ثم نضع الخليط كله علي بعضه في قالب مبطن بالسمن او الزيت
ونضع علي وش القالب مقدار ملعقه زبده سايبه او سمن وملعقه كبيره قشطه
ثم نرش الوش بالسكر المطحون من خلال مصفاه صغيره
ليصبح شكلها النهائي قبل الفرن هكذا
وتسوي في الفرن تقريبا نفس سوي الكيكه

ليصبح شكلها النهائي هكذا

ملحوظه :

- بعد خروجها من الفرن تترك حتي تبرد تماما ثم تقطع وتوضع في الثلاجه ثم تاكل بالهنا والشفا

طعمها بيكون قريب جدا من الكريم كراميل انا بعملها دايما بالكاستر مجربتهاش بالنشا (الكورن فلاور )

اللي عايز يجربها مبدئيا ممكن يجرب نص المقدار هيعمل قالب زي اللي فوق ده

وبالهنا والشفا

^_^

١٠:٤٢ م

إليـــهـــــا



اليها
الي نسمة الهواء اللطيفه في قيظ الحياه
الي منبع الامل بين جبال اليأس
الي اجمل بسمه تمحو تلال الحزن
الي اول يد تنثر الامان والحب
الي كل معاني الحياه
واسمي مشاعر الانسانيه
الي احن حضن في المجره الكونيه
الي واحتي
وجنتي
ومَدرستي
الي حياتي

أ

م

ي


شكرا علي كل حاجه

وسامحيني


الكلمات دي نقطه في بحر من احساسي تجاه امي

اول مره اكتب عن امي واحساسي بيها
مع انها نسمة الهوا اللي بتنفسه
حاجات كتيره اوي في حياتنا علي الرغم من اهميتها
الا ان "عاديتها" بتخلينا نتعامل معاها بفتور وروتين
واكيد ده بيكون سبب في تقصيرنا تجاهها
من اهم الحاجات دي
الام والاب
طول عمرهم بيدونا بدون انتظار مقابل
بيدونا بحب
الناس الوحيده في العالم اللي بيتمنو اننا نكون افضل منهم
كتير بتخيل نفسي لما اكون ام
هو انا هقدر اكون في حنية ماما وصبرها وتسامحها معانا !!
بتستحمل كتير جدا
بنعند
ونتكبر
وعمرها ما بينقص حبها رغم كل شيء

يمكن مقلتش الكلام ده لامي وابي وجها لوجها
لكن اتمني يكونو عارفين هما ايه بالنسبه ليا

ملحوظه :
دي فضفضه
البوست ده مش عشان عيد ام
السنه كلها لو عيد ام ماتوفي حقها
غير ان عندي تحفظ علي يوم عيد الام اللي بيكون سبب في جرح ناس كتير وألمهم بدل ما يكون مصدر فرح

١٠:٢٥ م

مــــــارس


الجميل في شهر مارس انه بينتهي فيه الشتا , وبيكون فيه عيد الام , امممم والاجمل والاهم انه بيبتدي بيوم ميلادي (3\3)تاريخ موسيقي ياناس .


من اهم مواليد اليوم ده واللي بحترمه جدا هو الفنان محمد صبحي .. وبالبحث عن حدث في مثل هذا اليوم كانت النتيجه :




سنة 940 - مولد عالم الرياضيات العربي أبو الوفا البوزجاتيسنة 1847 - مولد مخترع التليفون جراهام بلسنة 1853 - مولد الرسام الهولندي فان جوخسنة 1924 - خلع السلطان العثماني عبد الحميد آخر السلاطين العثمانيينسنة 1956 - صدور قانون الانتخاب ومنح المرأة حق الانتخاب لأول مرة في مصرسنة 1961 - تنصيب الحسن الثاني رسميًّا ملكًا على عرش المغرب .




ياااه يوم 3\3 مش يوم عادي خالص ..


كل سنه في اليوم ده افكر كنت فين ووصلت لفين حققت ايه وفشلت في ايه احيانا النتيجه بتكون جميله وكتير بتكون


العكس لدرجة اني في السنين الاخيره بئيت اكتئب من شهر مارس اللي بيجي بسرعه اوي كل سنه بس اللي بيهون كتير


عليا حالة الكأبه دي اخواتي واصحابي اللي بيفتكروني كلهم في اليوم ده ومش بلاحق هدايا تلفونات وزيارات وكلمات معايده ..


اجمل احساس في الدنيا انك متحسش بالوحده وتحس بحب كل اللي حواليك نعمة جميله ربنا ما يحرمنا منها اللهم امين


صحيح الافكار مش بتسيب حد في حاله وكل سنه لازم تاخد حقها في السنتين اللي قبل كده كتبت احساسي في اليوم ده


حابه اكتبهم هنا عشان السنه الجايه ان شاء الله ابص علي البوست ده واقراه واشوفني كنت بفكر ازاي ...





2007


زمان وانا صغير


زمان وانا صغير كنت بحلم ابقي كبير ............. كبر القلب واتحير مالدنيا والمشاوير ....قلت يا ريتني فضلت صغير


لما سمعت المقطع ده من الاغنيه سرحت مع نفسي وافتكرتني وانا صغيره افتكرت حاجات دورت عليها دلوقتي


ملقتهاش ... اد ايه ادايقت .... ليه كل ما نكبر يضيع مننا حاجه دورت في الوجوه لقيتها اتغيرت .... فيه اللي كرمش ...


ومنها اللي كشر ... ومنها الحزين ... وفيها اللي معرفتوش دورت في الشوارع لقتني تهت ...... فين البيوت ؟؟؟؟؟


اتغيرت سألت حيطانها ..... منها الجديد ميعرفنيش ومنها اللي الزمن هده .... مفتكرنيش ومنها اللي قالي عيشي يا بنتي


ومتساليش فين الشارع الكبير لما كنت صغيره .....لسه فاكره فيه جريت ولعبت ....... أووله ...نط حبل ... عجل ...


وكورة ,اه وقعت ... واتجرحت بس ضحكت .... كان ضحك جميل من القلب ..



فين صحابي ؟؟؟فين جيراني ؟؟؟ فين هند ومحمد واحمد وسالي ؟؟؟اللي سافر واللي نقل واللي معرفش عنه حاجه واللي


انتقل حتي اللي لقيته معرفتوش رسم الزمن علي وشه رتوش .... من الايام والسنين اللي عدت شايله وياها الالام والحنين


ومسؤليه تهد اتخن تخين حاولت الاقي حاجه واحده متغيرتش لقيتني ببحث عن مستحيل ...... قلبي اتوجع فضلت ألملم


ذكرياتي ...... وارجع اواجه حياتي ... وانا بقول لنفسي : يا ريتك ما كبرتي



2008
انا ومارس

هييييييييييييييه دنيا

سبحان الله الشهور دي بتجري ورا بعضها بسرعه اوي
الواحد لسه ملحئش يستوعب ان 2007 جت ألاقي 2008 بتزؤها وتدخل
لا وإيه شهر تلاته ده في اول السنه كده خبط رزع يعني لامفر اتحسبت السنه وبصمت بالعشره
الا هو الواحد مينفعش يقف علي كده بئه !!
حاسه ان السنه التلاتين وقفه في الطابور بتزؤ كل اللي اودامها عشان يصيبها الدور
الدور الدور موعوده ياللي عليكي الدور لا مؤاخذه يا شااااابه
ولا بلاش السيره دي لما تبئي تيجي التلاتين اوعدكم بموضوع نكد إنما ايه وصايا وصايا يعني( ماليش بركه غيركم )
وبصرف النظر يعني ان شهر مارس في اول السنه وانه في الكام سنه الاخيره اصبح مصدر قلق وعكننه ليا لانه كل شويه بيفكرني بالذي مضي ( دا علي اساس اني ناسيه يعني )
الا اني سبحان الله , لله في لله كده بحبه مش عارفه ليه يمكن عشان الناس بتفتكرني في اليوم ده وهدايا وبتاع وانا طول السنه محدش معبرني اساسا ياهل ترى
او يمكن عشان بيبتدي فيه الربيع وبخلص من كابة الشتا !!
او يمكن لانه شهر العظماء
مش عارفه . بس اللي انا متاكده منه انه مش بعيد كمان سنتين ألغيه من شهور السنه كولها
فييييين من اول مارس شرفت فيه للدنيا مش عارفه معملوش اليوم ده عيد قومي ليه دي مش اي مناسبه ياناس
اكيد يوم ما تميت اول سنه ليا ماما وبابا كانو فرحانين وهيطيرو من الفرحه واكيد جالي هدايا كتييييييير طبعا ماهي اول سنه بئه
( ومش هحاول افتكر اني تالت اخواتي يعني ماما وبابا زهئو عيال ومش بعيد كانو بيفكرو يسلفوني للجيران , وكمان هتناسي ان اخواتي الاكبر مني اكيد اخدو كل الهدايا ولعبو بيها وانا لا شفت ابيض ولا اسود
بس يمكن افتكر خامس مارس عملنا فيه حفله كبييييره عملت فيه ماما اعياد ميلادنا كلنا في اليوم ده ايه الحكمه مش عارفه بس يظهر كان فيه علاوة ولا حاجه قالت اما تضمن بابا
وكان اخي الصغير شرف ووقتها معدتش انا الصغيره وطبعا عليا انا التحمل اه ماهو الصغير بئه لا وايييييه اخر العنقود ( يعني ياربي مش كفايه اني اول السنه واكبر من صحباتي بشهور لا وكمان الوسطنيه
وطبعا هو اللي طفي الشمع يومها ولن انسي له هذا الموقف
تاسع مارس بئه بصراحه ده اللي مش هنساه ابدا ماما عملتلي حفله لوحدي وزينه وبلالين وهدايا أحمدك يارب
وجبت اصحابي وقلبنا البيت يومها واجمل حاجه بابا جابلي فيلم مخصوص عشان يصورني ويومها اعدت اتحكم مين اللي يتصور ومين لا بعيد عنكم السلطة وحشه بتغير في النفوس , هو صحيح يعني من يومها وبابا بيطلع في الفيلم بس انا لسه عندي امل ان الفيلم يطلع في يوم من الايام هه يا مسهل
وتكرررررررر الايام
لا لا الايام زمان مكنتش بتكر كانت بطيئه اوي دا انا كنت بدعي ربنا اكبر سنتين في سنه
وافتكر بالخير ايام ثانوي فعلا كانت من اجمل الايام كان تلات ارباع المدرسه صديقاتي شوفو انتو بئه صحيح يعني الهدايا كانت كلها دباديب وصحيح كلها نفس الشكل واللون
بس كنت فعلا بفرح اوي باليوم ده اللي بستناه من السنه للسنه واقول امتي بئه اوصل للعشرين
وافتكر في اليوم اللي تميت فيه عشرين سنه يااااه كان ناقص اجيب زفه وامشي اغني وجبت العشرين ياحلولي جبت العشرين ياحلاوة
كنت في أوج فرحتي (حلوة أوج دي لزوم الثقافه الجامعيه وكده وبتاع )يا
سلام كنت دايما فرحانه ومقبله علي الحياه وشايفاها وردييييييي( علي ايه معرفش )ومررررررررررررررت الايام
جبت الواحد وعشرين
والاتنين وعشرين
0
0
0
0
الي اليوم
وااااااااااادي مارس جديد بيضيف رقم جديد شايل معاه شوية خبرات علي
تجارب علي بعض حسنات علي كتير سيئات و صداقات جديده وحبة زكريات
والحسابه بتحسب
وياعالم مارس الجاي هكون ايه ولا فين ولا ليه !
وعلي راي الحكيم اللي معرفوش :
عام مضي .. عام ات
هكذا الدنيا حتي الممات


2009


السنه دي مش هقول غير ..

الحمد لله علي نعمة الاهل

الحمد لله علي نعمة الاصحاب

الحمد لله علي نعمة الصحه

الحمد لله علي نعمه التي لاتعد ولا تحصي

امنيتي السنه دي ربنا يرضي عني ويرضيني

وكل سنه وانا طيبه

١١:٥٩ ص

سمك على الطريقة الفلبينيه

السلام عليكم ورحمة الله وبركاته

واخيرا بعد طول غياب عدت لمدونتي حبيبتي

وجايبلكم اكله لذيذه جدا وسهله جدا جدا


سمك بالطريقه الفليبينيه مع الرز بالجمبري


اولا : طريقة السمك ...

المكونات :
سمك فليه - بصله مفرومه - ثوم - 2ملعقة خل - 2ملعقة صويا صوص
2ملعقة نشا - فلفل اخضر - ملعقة جنزبيل مفروم - ملعقة صغيره سكر -فلفل اسود


الطريقه :
يوضع الملح والفلفل الاسود علي السمك ثم يوضع السمك في الدقيق ويحمر في الزيت
(ده بالنسبه للسمك الفليه )

بالنسبه للصوص :

يوضع قليل من الزيت في طاسه وضع فيه الثوم المفروم +فلفل الوان (اخضر واصفر
واحمر مقطع مكعبات صغيره )+ البصله المفرومه + الجنزبيل +رشة سكر
+ملح وفلفل +الصويا +خل + ملعقتين نشا ليصبح القوام تقيل
وبعد ذلك توضع شرائح السمك المقلي في طبق التقديم
ويوضع عليه الصوص ليقدم مع الرز بالجمبري




الرز بالجمبري

الطريقه :

بصل مفروم +فلفل اخضر +كسبره ناشفه +كمون +ملح وفلفل +جمبري
يشوح البصل في الزيت حتي يصبح لونها احمر تماما (بدون ان تحترق لانها لو احترقت
طعم الرز بيكون مر ) ثم نضع عليها كمية الماء التي تناسب كمية الرز المستخدم ونضع
عليها الملح والفلفل والكمون والكسبره وممكن ثوم مفري وشطه حسب الرغبه
ثم نضع 2قرن فلفل اخضر مقطع مكعبات صغيره ثم نضع في حدود نصف كيلو جمبري
وعندما تصل للغليان يوضع الرز ويترك ليستوي بالطريقه التقليديه


ويقدم معها السلطه الخضره


لتصبح وجبه شهيه ولذيييييذه


وبالهنا والشفا

١١:٥٠ ص

إعتذار


بعتذر عن التاخير


بس اللي بيحصل في غزه كتير اوي


مفيش نفس لاي حاجه الا التفكير في وضع الناس هناك


ربنا ينصرهم يارب






اللهم يا عزيز يا جبار اللهم اعز جندك وانصر دينك واتباع نبيك اللهم ثبتهم واربط على قلوبهم اللهم انصر اخواننا المجاهدين اللهم انصرهم على عدوك وعدوهم اللهم كن لهم وايدهم بتأييدك وانصرهم بنصرك اللهم انا نشكو اليك ضعف قوتنا وقلة حيلتنا وهواننا على الناس اللهم الى من تكلنا الى بعيد يتجهمنا ام الى عدو ملكته أمرنالك العتبى حتى ترضى ولك العتبى اذا رضيت اللهم ان عافيتك هي اوسع لنا اللهم انا نعوذ بنور وجهك الذي اشرقت له الظلمات ان يحل بنا غضبك او تنزل بنا نقمتك ..اللهم اكفنا شرورهم بما شئت انهم لا يعجزونك اللهم يا رب الارباب وملك الملوك يا من خضعت لك رقاب العباد يا عزيز يا جبار انهم لا يعجزونك اللهم خذهم أخذ عزيز مقتدراللهم انصرنا عليهم اللهم انصر اخواننا المجاهدين عليهم اللهم ان تهزم هذه الطائفة فمن يعلي رايتك بعدها اللهم انصرهم اللهم سدد رميهم اللهم تولى امرهم وكثر رميهم وسدد سهامهم ووحد كلمتهم واربط على قلوبهم وثبت افئدتهم ووحد صفوفهم وانصرهم على عدوك وعدوهم اللهم نصرا كنصر يوم بدرتعز به امتك وترفع به كلمتك وتنصر به دعوتك اللهم انا المقصرون في جنابك نرفع اكف الضراعة اليك لا اله لنا غيرك ولا رب لنا سواك اللهم يا حنان يا منان يا بديع السماوات والارض برحمتك نستغيث اللهم برحمتك نستغيث فلا تلكنا الى انفسنا طرفة عين ولا اقل من ذلك اللهم اغثنا اللهم اغثنا اللهم اغث اخواننا بغزة اللهم اغثهم اللهم كن لهم عونا ونصيرااللهم كن معهم برحمتك اللهم انصرهم اللهم انصرهم اللهم انصرهم برحمتك يا ارحم الراحمين اللهم آمين وصلى اللهم على نبينا محمد وعلى آله وصحبه وسلم

١١:٤٣ ص

عيد اضحى مبارك


كل سنه وانتم طيبين
عيد سعيد علينا وعلي الامه الاسلاميه يارب
وحج مبروك لكل حجاج هذا العام
وعقبالنا يارب العام القادم
عيد اضحي مبارك

١١:٢٨ ص

مقرمشات الذرة


مــقــرمــشــات الذرة



المقادير :

1 كوب دقيق ذره صفره

ملعقة زبد صغيره

ملعقة ملح صغيره

ماء ساخن حسب احتياج العجين




الطريقه :

يوضع الدقيه وعليه الملح والزبد ويزود بالماء الساخن حتي يسيح الزبد ويعجن جيدا ويراعي ان يكون قوام العجين سايب وليس متماسك (شرط لنجاحها )

ناتي بصينيه تيفال (لعدم التصاق العجينه ) وبظهر الملعقه يتم فرد العجينه في شكل وحدات الشيبسي ( اهم شيء مش نعملها تخينه عشان تطلع مقرمشه لو تخناها بالمعلقه هتكون طريه شويه زي العيش ) وممكن وضع الجبن الرومي المبشور علي وشها حسب الرغبه .

ثم توضع في الفرن

ملحوظه هامه : الوقت المستغرق في الفرن بسيط جدا لا يتعدي دقيقه او اتنين لانها سريعة السوي

ممكن تاكل لوحدها او مع الجبن بانواعه او مع الشاي او أي صوص

وبالهنا والشفا




١١:٠٧ ص

وإذا الموؤدة سئلت بأى ذنب قتلت

الوأد النفسي


لا يختلف كثيرا عن الوأد في العصر الجاهلي فكلاهما يؤدي الي الموت
فلا فارق كبير بين موت النفس وموت الشخصيه وطموحها في كلا الحالتين هي بلا روح
- فعندما تتوقف الدنيا من حولك وتختل موازينها لمجرد انكِ مازلتٍ أنسه في الثلاثين ... فهذا وأد
- عندما تقام حولكِ كل الأسوار والقيود لمجرد حمل لقب مطلقة او أرمله فهذا وأد
- عندما تتخلي عن أهم وأكبر أحلامك لإرضاءمن تحبيهم دون تقديرهم لذلك ...فهذا وأد
- عندما تكوني شخصيه ناجحه وقويه وتحاربي بكل الطرق لمجرد أنكِ إمرأه... فهذا وأد
فحينما تتحكم في مصائرنا تقاليد باليه وعقول تعاني الانفصام الفكري فلن أندهش أبدا من عودة العصر الجاهلي ووأد المرأه الذي لن يكون بيد رجل واحد .... بل المجتمع بأكمله .

٥:١٧ ص

بنت من الزمن ده

بنت من الزمن ده

مسلسل اخر يضاف لقائمة دراما الاعاقه النفسيه ومنتهي الاستخفاف بعقلية المشاهد

ولا اعلم لماذا يصر صانعوا الدراما قمة الاصرار علي تهييف وتهميش هذه العقليه

علي الرغم ان المشاهد نفسه هو لب هذه الصناعه فهي المفروض في الاساس اليه

وحتي لا اخرج عن الفكره الاساسيه لموضوعنا

فبما اني احد بنات الزمن ده علي ما اعتقد وادعي فكان لازما ولابد وحتما ان ابوح بما يكتم علي مراوحي (ممكن اروح فيها ياناس )

اخشي ان اصاب قريبا بالهسهس ان لم اصل لاجابه لذلك السؤال :

من اين اتي المؤلف بهذه البنت (شروق) التي من الزمن ده ؟؟!!

فانا في هذا الزمن من زمان كما تدعي شهادة ميلادي ولم اري او اسمع عن هذه البنت

دعوني اعرض فكره لمن ليس لديه فكره

المسلسل باختصار شديد عن احد فتياة الشوارع

والفارق بينها وبين غيرها من زميلاتها انها تعيش مع اسرتها الفقيره في احد العشوائيات او الخرابات اذا جاز التعبير

اي انها تعرف اصلها من فصلها

طبعا صورها المؤلف في ابهي صور الشجاعه والمجدعه والامانه والاباء والكرامه والضمير ونظافة اليد وزكاء العقل والنباهه ....الخ

وطبعا من اجل الحبكه الدراميه وحشو الاحداث لتصل الي 30 حلقه ويزيد لابد ان تتعرض لكم من المشكلات والازمات والتي اذا تعرض اي انسان طبيعي لنصها كانت كفيله للقضاء عليه بالسكته القلبيه والشلل الرباعي

وعلي الرغم من ذلك ممكن تمر هذه الاحداث مرور الكرام

لكن وبما اني بنت من الزمن ده لايمكن ولا يجوز ولا يصح ان امرر رغبة الكاتب الغريبه جدا

في تعليق الشاب الجامعي خريج كلية الهندسه الوسيم ابن رجل الاعمال الناجح بهذه الفتاه علي الرغم من رؤيته لها في اشارات المرور بملابسها المرقعه وبيئتها العشوائيه واسرتها المفككه سيئة السلوك !!

ولن اغفر له بتاتا هروبه من مشكلة وضعها هذا وتغيير وضعها علي النقيض تماما بتكفل احد علماء الاجتماع لها واجراء بعض التجارب والابحاث عليها علي غرار مسرحية سيدتي الجميله وتحويلها من شخصيه متشرده عشوائيه الي باحثه حاصله علي الماجستير واجادتها للعديد من اللغات وزواجها ن ابنه الدكتور وذلك خلال خمس سنوات فقط لا غير !!!!!!!!!!


بالطبع لا احقر من اهل العشوائيات واصحاب المهن البسيطه

ولا استهين ابدا بكل انسان طموح للوصول للافضل

لكن مالم اسمح به الاستهانه بي كمشاهد عموما

وكبنت من الزمن ده خصوصا

خمس سنين !!

خمس سنين من انسانه جاهله متشرده الي باحثه حاصله علي الماجستير !!

مهندس شاب متعلم ذو مستوي اجتماعي مرموق يتمسك بهذا النموذج ويتحدي العالم من اجله ويرفض الارتباط بسواها !!!

دي شهادة محو الميه لوحدها بتاخد تلات سنين علي الاقل

ويرجعو يقولو دراما الواقع واحنا بنمثل واقع ملموس

لعل اسم العمل الاصلي : " بنت من المريخ " ولكن تم التغيير للتمويه !

امضاء : بنت من الزمن دهون *_^

يتبع

٥:٠٩ ص

عيد سعيد




كل سنه وانتم طيبين



عيد سعيد علينا وعلي الامه الاسلاميه اللهم امين

٤:٥٠ ص

سمبووووووسك

السلام عليكم ورحمة الله وبركاته

انهارده هنعمل سوي سمبوسك

وده نوع حلو زي القطايف كده بس الذ بكتييييير من القطايف
كمان سهله
المقادير :

1كوب دقيق

ملعقه كبيره زبده او سمنه

نصف كوب لبن (او اقل حسب احتياج العجين )

ربع ملعقه صغيره ملح

ربع ملعقه ضغيره سكر

مكسرات للحشو (زبيب - جوزهند - فول سوداني - سكر -قرفه ...الخ)


الطريقه :


1- يرب الزبد جيدا حتي تسيح



ثم يوضع الدقيق علي الزبد ويراعي نخله (عشان يدخله الهوا والسمبوسك ميكونش مكتم )


ونقلب جيدا حتي يمتزج الدقيق بالزبد



ثم نضع الملح والسكر واللبن ونراعي مع وضع اللبن ان يكون علي مرات وحسب احتياج العجين


لان ممكن الدقيق لا يحتاج كمية اللبن كلها



ثم تعجن جيدا حتي تصبح العجين قطعه واحده


ثم تكور العجينه كور صغيره



وتفرد كل كره بحيث تكون رقيقه ونضع في منتصفها الحشو



وتقفل بطريقه معينه : تثني الاطراف علي بعضها


ونيجي من الحرف ونلف الاطراف علي بعضها كما هو موضح بالصور ونراعي احكام الغلق عشان متتفتحش اثناء القلي












كده جاهز علي القلي في الزيت زي القطايف بالظبط


بس ناخد بالنا انها بتتحمر بسرعه جدا


مش بتاخد وقت علي



وعشان نتاكد من نجاح السمبوسك هنلاقيها فارغه من جوه

يعني عاليه ومش لازقه في بعضها

بعد كده نرش عليها سكر ناعم

وبالهنا والشفا

ياريت تجربوا وتقولولي رايكم

٤:٣٦ ص

انت والمطبخ ورمضان

انت والمطبخ ورمضان




السلام عليكم ورحمة الله وبركاته

رمضان كريم عليكم وعلينا اللهم امين

وينعاد علينا وعلي الامه الاسلاميه باليمن والبركات يارب

طبعا كلنا عارفين انه شهر الطاعات

والكنافه والقطايف والمحمر والمشمر

وعشان كده مش بنلحق ندي للشهر حقه

وهو شهر واحد في السنه كلها

عشان كده ايه رايكم نشوف شوية افكار نوفر بيها وقت ومجهود في الشهر ده عشان نستثمره صح يعني مطبخ طول
النهار وقيام طول الليل مش هينفع خالص

فياريت اللي عنده أي فكره ميبخلش علينا واهو كلنا نستفيد

مثلا بالنسبه للاكل وتحضير الفطار

نحاول نشوف ايه الحاجه اللي بنحتاجها كل يوم

- مثلا الرز يتنقي ويتنضف ويكون علي الاستخدام علي طول
- الخضار فيه ناس كتيره بتخزنه عشان تستخدمه في غير اوانه زي البسله مثلا وغيرها لو عندنا فعلا ده كده هنكون وفرنا حاجه من المجهود لانها هتكون جاهزه
- لو باميه تبقي متقمعه وجاهزه علي الطبخ علي طول
- مثلا القلقاس ده اوانه مش هيكون جاهز بس ممكن نجهز خلطة الخضار بتاعته ونحطها في الفريزر ووقت الطبخ تكون جاهزه علي طول
- ومفيش مانع اننا نطهي الصلصه ونحطها بالفريزر ودي بتنفع جدا في بعض الاكلات الصعبه خصوووصا المحاشي اللي بتاخد وقت كبير في التحضير
- بالنسبه للحوم سواء فراخ او لحم بقري او مفروم مفيش مشكله خالص اننا نحطه في الفريزر طبعا ده بكميات معقوله علي حسب استخدامنا
- لو بتعملي كفته كتير بيكون مريح جدا لو عملتيها وصبعتيها وحفظتيها في اطباق فايبر في الفريزر ويادوب علي التحمير وخصوصا انه معظم الناس بتحب النواشف في رمضان
- لو علي المخللات كتير بيفضلو انهم يخللوا الحاجات اللي بيحبوها قبل رمضان بفتره وده بيكون افضل وانظف واوفر

والاهم واللي مش لازم ننساه ابدا اننا نستخدم كل حاجه بكميات معقوله ودايما نفتكر انه في ناس تانيه في مجاعات
فالنعمه اللي ربنا رزقنا بيها المفروض نستخدمها بعقل وحكمه
يعني نطبخ الحاجه علي اد طاقتنا ومش لازم نرمي كل يوم حلل مليانه من خيرات ربنا لانه في الصيام محدش بيفضل
البايت لو الاكل زاد علينا نصرفه في ساعتها علي طول لحد محتاج ممكن ميكنش فطر كويس يتعشي بيه مش نستني
لتاني يوم لان فيه اكلات لو باتت مش هتكون حلوة

طيب لو عندي اكل بايت مش هرميه بس عايزه اجدد فيه اعمل ايه ؟؟

فيه بعض الاكلات ممكن نتصرف في تحويلها لاكله جديده طيب زي ايه

مثلا السمك

اكلة السمك لو باتت مش بتكون ظريفه ابدا وخصوصا بئه لو مشوي
طيب دا اللي اتبقي كان كتير خساره ارميه ؟
طبعا لا ناخد السمك ونقشره ونفصصه واخد كل اللحمه بتاعته واضيف عليها توابل ملح وفلفل وكمون وكزبره واقطع
عليها بقدونس اخضر مع فصين توم وبصله وثمرتين بطاطس مسلوقه واهرسها كويس جدا
وبعدين اصبعها زي الكفته تمام واقليها بالبيض والبقسماط وتتاكل مع طحينه ولا بابا غنوج تبئي تحفه

كده بئه عندي اكله لذيذه خالص كفتة السمك واعمل جمبها رز احمر بالبصل والتوابل وبئت اكله في منتهي اللذه ومش رمينا حاجه


طيب لو اللي بات عند لحوم هقول برضه مش مشكله خالص
سواء كانت لحمة او فراخ او بط حتي لما بتبات طعمها مش بيكون لذيذ ممكن اخدها وافصصها نساير صغيره وبعدين
اقطع فلفل اخضر وقطع طماطم وبصل اشوحها في شوية زيت ولما يدبلو شويه احط عليهم ملح وفلفل وبهارات وشعرة
قرفه مطحونه وجوزة الطيب وبعدين اضيف عليها اللحم المقطع واسيبها شويه علي النار لما تاخد من بعضها وارفعها

وادي اكله تانيه مع طحينه برضه بتتغمس بتكون لذيذه جدا نحمر جمبها بطاطس ولا حاجه او شوية ملوخيه

الجميل فعلا انك مش بترمي حاجه ومش بتاخد منك وقت خالص غير الطعم الذيذ

لكن فيه اكلات مينفعش معاها تغيير دي بئه بنصح انه قبل ما نصلي العشا نكون اتصرفنا فيها منها مش هتبات ومنها حد تاني يكون انتفع

طيب بالنسبه للحلويات نعمل ايه

الحلويات لو باتت مش هيجري لها حاجه بس ممكن تنشف شويه و يزهئوا منها مثلا :

القطايف:


لما تبات بتطري ومش بتكون لذيذه اما لو محشه كريمه لا يفضل انها تبات اصلا لذلك ياريت لو هنعمل قطايف نعمل علي
اد استخدامنا اليومي فقط لا غير ولو مش عندك وقت تعمليها كل يوم ممكن تحشيها كلها وتعملي نصها انهارده وتحطي
الباقي في طبق في الفريزر بس لازم تستخدميه تاني يوم لانه مش بيعد كتر من كده

الكنافه :

عادي بتعد ومفيش مشكله بس لو بالكريمه مش هتستحمل اما لو بالمكسرات هتعد بس هتنشف طيب الحل ايه . انا اقولك
ممكن تجيبي لبن وتغليه وعند التقديم تحطي كل خارطه في طبق وتحطي عليها اللبن المغلي بيكون طعمها لذيييييذ جدا جدا
طيب لو حد مش بيحب اللبن او الطريقه دي تقيله عليه
هقوله في طريقه تانيه : هاتي الكنافه الباقيه اللي عملتيها ومحدش راضي يكلها غالبا بتكون نشفت من العسل اللي عليها
هاتيها كسريها خالص يعني فتفتيها ومتكونش خرط وبعدين في بخاخه حطي فيها لبن وبخي اللبن عليها عشان تطري لو
فيها عسل كفايه خلاص لو عسلها قليل حطي شويه عليها كمان عشان تطري لو سمنتها كتيره مش تحطي تاني لو قليله
حطي معلقه ولا حاجه وعلي النار هاديه قلبها كلها وبعدين اما تسخن كده كبسيها في قوالب الجيلي الالمونيوم دي اللي
بيكون فيها اشكال في قاعها وبعدين اقلبيها في طبق وقدميها طبعا بيكون فيها مكسراتها لو حابه تضيفي كمان انتي وزوقك

بس فعلا بيكون طعمها جميييييل

اما بالنسبه للعصاير بئه فياريت نستخدم العصاير الطبيعيه بتكون مفيده جدا لجسم زي التمر هندي والخروب والكركديه
ماليش دعوة بالعرق سوس ^_^وماشي مفيش مانع من قمر الدين والجوافه والمانجه
والعصاير دي تحديدا مش هتكلم فيها انها اكيييد بتخلص لانه الواحد بيكون محتاج حاجه تساعده علي مواصلة الصلاه
والقيام ومش بتكون تقيله ولا حاجه بس ناخد بالنا من السكر اهم حاجه

الخشاف والتمر والكلام ده انا بنصح انه اليوم اللي نعمل فيه خشاف بلاش حلويات والعكس .
لان لو الاتنين مع بعض هيكون كتير اوي صحيا ونفسيا وماديا ^_^


ياجماعه والله السكريات دي اكبر غلط علينا ياريت ناخد بالنا هي البطن هتاخد ايه ولا ايه بس

ومننساش نفطر علي التمر سنه

واخير ا لا ننسي شهر رمضان في الاصل شهر الطاعات

لي عوده تانيه ان شاء الله في الاستعدادات للعيد والعشر ايام الاواخر اللي بتضيع فيها

في انتظار تعليقاتكم

٣:١٨ ص

رمضان كريم



كل سنه والامه الاسلاميه كلها بخير

رمضان كريم علينا وعليكم يارب

وينعاد عليكم باليمن والبركات

رمضان كريم

٢:٥٨ ص

بيييييييتزاااااااااا


السلام عليكم ورحمة الله وبركاته


لازم انزل بوست جديد فيه اول الكلام الفعلي بتاعنا

وعشان هو اول حاجه بئيت محتاره جدا

ياتري يكون عن ايه

هل نتكلم في موضوع اجتماعي يهمنا كبنات

ولا نبتدي مثلا بموضوع عن الاشغال اليدويه

ولا اكبر من كووول الصوداع ده ونعد نتكلم عن فضفضاتنا واحاسيسنا

واعدت افكر وافكر
وفجاه سمعت صوت
لا لا مش جرس الباب
دي عصافير بطني اللي صوتها راح من النونوه

قلت بس وجدتها
اول موضوع عن الاكل
وبما اني بحب جداااا البيتزا
قررت تكون اول وصفه للبيتزا
صحيح هي مش عمايل ايديا وحياة عنيا
لكن كل خطواتها كانت علي يدييييييي

و اكلت منها واقدر اؤكد لكم وابصم بالعشره انها كانت راااااااااااااائعه الطعم
وتسلم ايد اللي عمل
وبالهنا والشفا علي اللي اكل
وشوفوا وجربوا وتعالو قولولنا علي النتيجه
وانا كمان علي فكره هجرب بايدي ان شاء الله
واذا كان في العمر بقيه هاجي واقولكم النتيجة
ما احنا اتفقنا اني بتعلم معاكم
يلا بينا نبتدي :


بيتزا مارجريتا


المكونات :



1 ك دقيق
ملعقة خميره فوريه
1ملعقة ملح صغيره
نصف ملعقة سكر صغيره
نصف كوب زيت
2كوب زبادي
ماء دافيء



الطريقة ...

يوضع الملح والسكر والخميره علي الدقيق


ويقلب حتي يمتزج مع الدقيق ثم نضع الزبادي

والزيت ويقلب الخليط جيدا

(ملحوظه : الزيت بيتحط مباشرة دون تسخينه )

ثم يوضع الماء الدافي للعجن وبيكون حسب احتياج العجينه

مع مراعاة ان تكون المياه فاتره لانها لو ساخنه هتفشل العجينه

ويتم العجن



وتترك العجينه حتي تختمر تماما

ثم تقطع كرات علي حسب العدد المطلوب

ثم تفرد كل قطعه علي حدي ويضاف اليها الحشو

الحشو ...



بالنسبه للمكونات اللي بتتحط علي البيتزا دي حسب زوق كل واحد في الاكل
هنا حطينا فلفل اخضر - طماطم - زتون اسود قطع - لحم مفروم معصج
جبن متوزريلا - جبن دوبل كريم - صلصه عليها معلقة زيت وقيلي من الملح والفلفل
لدهان العجينه بعد فردها بالصلصه ثم نضع العصاج وعليه الطماطم والزتون والفلفل وعلي الوش الجبنه

(ملحوظه: بيتزا المارجريتا بتكون حشوها صلصه وجبنه فقط )
وده كان الشكل النهائي للبيتزا




وبالهنا والشفا

ياريت تجربو وتقولولي رايكم