6:41 م

الحلقة التانية

طب ليه اشتغل
بعييييييييييييييييييييييييد لما ممكن اكون قريب

لا هو كده ومفيش غير كده

اوك اجررررررررررب

وتوكلت علي الله وعزمت

وقفنا البوست اللي فات اني عزمت وتوكلت

بس نسيت اقول حاجه مهمه هي طبيعة الوظيفه

انا اتعينت اخصائية مكتبة

وكنت فرحانه اوي بالموضوع ده لاني مش بعرف اعمل حاجه في حياتي اد القراية





ومن صغري وانا في المكتبات

اخيرا ياربي هشتغل حاجه بحبها معقولة دي !!

عشان كده تغاضيت مؤقتا عن موضوع مكان المدرسه وظروف الوظيفه

وقبل ما امشي من مكتب التوجيه قالتلي المديرة لسه حاجه صغيرة بس هتعمليها عشان ورقك يكمل هتعمليها وتجبيهالي خلال 15 يوم

( معقول بعد كل الاوراق والامضاءات اللي عملتها لسه فيه )

قلتلها خير !

قالتلي عايزين فيش

ايه الفيش ده

دي ورقة هتخلصيها من قسم الشرطة اللي تابعه منه

ياربي انا علي اخر الزمن هدخل قسم !!!!!!

روحت قلت لبابا تصدق يابابا طالبين منا كعب داير o_0

وفييييييين علي مافهمت ايه الفيش ده واللي في رايي مفرقش كتير عن الكعب الداير *_*

المهم ناس كتير اعدو يوصفولي المدرسه اللي هروحها دي فين واركبلها منين واوصلها ازاي

وتاني يوم ذهبت الي المدرسه باكرا

الساعه 10 كده

ماهو ده بدري جدا بالنسبه لي

وكان احساس غرييييييييب

المدرسه كانت في الارياف واي حد غريب بينزل بلد ريفيه بيكون معروف انه غريب

فالناس بيكون عندها حب المعرفه والفضول ده مين وليه وفين وعشان ايه

وده اللي لمسته من لحظة ما ركبت العربية اللي هتوصلني للبلد

وخد عندك بئه اول ما دخلت المدرسة اي حد يقابلني انتي مين وعايزه ايه

ياجماعه عايزة المدير

ايوة يعني انتي مين

حوالي خمستلاف شخص قابلني قبل المدير

واول مادخلت حجرة المدير كنت مقررة جدا اني هستقيل قبل ما امضي استلام العمل

قابلني شخص في حجرة المدير قالي نعم

( نعم ايه انا جاية اشحت منك )

قلتله حضرتك انا اخصائية وجايه استلم

قالي احنا مش محتاجين

(يانهارك زي بعضه بتقولي مش محتاجين !! )

وفي منتهي التحدي قلتله طب حضرتك اكتبلي ورقة بالكلام ده وانا هاخدها للادارة التعليمية وابلغهم بامتناعك

وطبعا استلمت ومضيت حضور في نفس ذات اللحظة

وقالولي روحي دلوقتي بئه وتعالي بكرة تكوني هنا الساعه 7 ونص صباحا

وكانت دي اكبر مشاكلي في الموضوع اني اصحي بدري ودي كانت كارثة بالنسبة لي

وتغلبت علي المشكلة دي بأني كنت بطبق اليوم وانام بعد ما ارجع من المدرسة وفضل يومي مقلوب كده لحد ما كل شيء اتظبط وبئيت انام من الساعة 8 مساءا زي الفراخ

وكان اول مرة ادخل فيه المكتبة واعد علي مكتب كان احساس جميل ومخيف في نفس الوقت

اول مرة اكون في مكان لوحدي من غير صحباتي ومعرفش حد خالص في المدرسة الا الامين اللي معايا

كنت طول الوقت اعدة ماسكة في ايدي كتاب وبقرأ تقريبا قريت نص كتب المكتبة في اول اسبوع

وكنت فاكرة ان الشغل كده وخلاص

لحد ما الامين فهمني ايه شغل المكتبة وعرفني يعني ايه اخصائية وايه مهامها واول حاجة فزعت لما عرفتها اني ليا جدول حصص واني هدرس حاجات للطلاب .

وطبعا دي كانت مصيبة بالنسبة لي خصوصا لما اكون خجولة وبغرق في شبر مية بالاضافة الي ان المكتبات مش تخصصي ومدرستش تربوي عشان اعرف اتعامل مع الطلاب !!

اتفقت مع الامين انه اللي يعطي الحصص مبدأيا علي ما افهم الموضوع وكنت براقبه هو بيمشي الموضوع ازاي

وعمري ما انسي اول مرة ديرت فيها فصل لوحدي كنت برتعش وصوتي مش طالع خالص

بعد كده لئيت الموضوع لذيذ اوي وده اللي خلاني مفكرش اسيب الشغل بعدها

والصدمة التانية ان شغل المكتبة مطلعش قراية ولا توزيع كتب علي الولاد

دا طلع 25 سجل

اي نعم انا مسؤلة سجلات ودفاتر كتيرة اوي والمفروض بشغل كتير منها يوميا !!

محاضرات - مناظرات - مسابقات - ندوات - استعارة - احصاء شهري - يومية مكتبة - مترددين - اذاعة - معارض -موهوبين - مهارات - قراءة حرة - قراءة موجة - خدمة منهج - برنامج زمني - نشاط فني - كل ده غير الاعمال الفنية من فهرسة وتصنيف وقوائم ببلوجرافية *_*

انا المفروض اعمل كل ده !!!!!!!!!!!!!

بس اكتر حاجة تخنق في الموضوع حكاية اول مرة اشتغل

كلمة اول مرة دي بتشيل وراها حاجات كتيرة اوي
اللي رايح والجاي بيسأل في حاجات مالوش فيها خالص وعشان انا جديدة ومعرفش فاكرة ان ده العادي وان كل الناس عارفه عن بعضها كل حاجة بحكم شغلهم في مكان واحد

وعشان كده قررت اعمل بوست مخصوص للناس اللي اول مرة تشتغل تتعامل في المواقف اللي زي دي ازاي .


انتظروا البوست الجاي ان شاء الله

7 التعليقات:

salma mohamed يقول...

يااااااااه كل ده,
كل مره اقرأ اقول الحمد لله على نعمة البطالة :)

A32L MaGNoNa يقول...

مستكة ..

ازيك .؟

انا اول مرة اجي هنا

عندك شاي ولا كبتشينو ولا اجيب معايا ؟؟

بوست جميل حسستيني بمدي المعاناه

ربنا يستر كلها شهرين تلاتة وابقي عاطلة اد الدنيا ^_^

باذن الله هتابعك كتيررررررررررررر لو تسمحيلي ^_^

كلمات من نور يقول...

مستكة هو انتي اصلا خريجة وثائق ومكتبات والا الهوى رماكي؟؟؟؟؟؟؟ شكلك مش خريجة علشان اتفاجئتي بطبيعة العمل ...أصل أنا خريجة هذا القسم يا فتاتي بس مشتغلتش بيه ..........متاعبين معاكي لآخر السنة (:

كلمات من نور يقول...

أسرة منتدى زبد البحر يسالونك شاكرين بأن تنضم إلينا :
http://mhg1962.ba7r.org/forum.htm

مستكه يقول...

ازيك ياسلمي عامله ايه

لا مش للدرجة دي

متاخديش حكم مسبق استني لما اخلص

غير ان فيه فروق بين الناس في القدرة علي التحمل وحب العمل

انتظري للاخر ^_^

مستكه يقول...

اعقل مجنونة

اهلا بيكي منوراني

طبعا يسعدني انك تزوريني دايما

بس الله يخليكي متتعقديش من اللي بقوله

ودوري علي شغل متاخدينيش نموذج خالص مالص

مستكه يقول...

كلمات من نور

حمدلله علي سلامتك

انا الهوا مش رماني لا دا حدفني حدفة مايعلم بيها الا ربنا

مش خريجة مكتبات خالص للاسف

حضرتك مشتغلتيش بيه عشان عارفه متاعبه ياتري

ياريت تقوليلي رايك في عمل المكتبات بما ان حضرتك متخصصه