8:48 م

اول مرتب

ونكمل من تاااااااااااااااااااااااااااني المشوار




خلصنا في البوست اللي فات انواع زملاء العمل




انهارده عايزة اتكلم عن اول مرتب




تجربة رااااائعة


انك تعرف قيمة الفلوس


انك يكون معاك فلوس بتاعتك مش من حد انت اللي تعبت فيها


والله احساس قمة الجمال


بصرف النظر عن قيمة الفلوس وعددها الاحساس جميل جدا


تيجي بئه بعد النشوة والسعادة والانشكاح انك بئيت حد بيجيب فلوس من نفسه


مش عايشه عالة علي كل خلق الله


هتحس بالصدمة


زي بالظبط عملية البسترة بارد وسخن في نفس الوقت والله ينور


الصدمة بئه في قيمة الفلوس


وهتلاقي نفسك لااراديا بتردد الاغنية الشهيرة للاخ ابو جريشة


" 145 جنيه هعمل بيهم ايه ولا ايه ...."


وساعتها ايقنت انه لامفر من طلب الدعم المادي من والدي وخصوصا بعد ما زادت المسؤليات


يعني خروج كل يوم بسلطاته وباباغنوجه هيحتاج مضاعفة الدعم المادي

والجميل في الموضوع حكاية المكافئة

اللي امة لا اله الا الله بتكون نبراها ومنتظراها

يعني من اول مدير المدرسة وهو بياخد منك قبل ماتقبض رسوم التلفونات وكيت وكيت

لحد بياعين الفاكهة والخضار

اللي لو تكلمت معاهم في اي حاجة يقولولك كل سنة وانت طيب

وكل مكافئة وانت طيب

واللي الحمد لله مبتعدش اصلا وبتتبخر زي اي حاجة في حياتنا ما بتتبخر

ده كان بالنسبة للمرتب


نيجي بئه لمتاعب المهنة


ومتاعب المهنة بالنسبة لي غير اي حد في نفس المهنة

غير طبعا مشكلة الصحيان بدري


ازااااااااااااااااااي


انا هقولكم


اول ما اشتغلت اخدت دور حصبة الماني محترررررررررم




وكنت انا الوحييييييييييدة في المدرسة اللي تعبت




يعني ولا طالب ولا طالبة اخدو الدور ده


بيتهيألي لانهم اتطعموا وانا لا ):


وعلي التعليقات اللي اخدتها بئه واللي كانت اهمها :


"بدل مانحط اسمك في المكافأت هنحطه في التطعيمات "


" خلصي الجدري وتعالي "


" طب المدرسة لما تحصب الطلاب يعملوا ايه "


وكان دور دور


الله يعين الاطفال بيتعبوا فعلا !!




تالت حاجة عايزة اتكلم عنها الامتحانات


وما ادراكم ما الامتحانات


وكنت كتبت عنها قبل كده في مدونة فخفخينا ياريت تقروها هناك

بس الله يكرمكم تعلقوا هنا عشان معدتش بعرف ادخل هناك








يوميات مراقب







وبجد الامتحانات دي بيحصل فيها حاجات غريبة

انا لما كتبت ملاحظاتي عنها كان في اول مرة اراقب فيها

انما بعد كده فهمت شوية العملية ماشية ازاي

ومقدرش ادين المدرسين او القائمين علي الامتحانات

فعلا الل بره الموضوع غير اللي جواه

وقوانين التعليم المفروض لا توضع تحت بند قوانين التعليم لأ

دي توضع تحت عنوان صدق او لا تصدق

مش هطول عليكم ما احنا فعلا في بلد العجايب

يلا بجملة عجيبة من العجائب

مش عارفه هرجع تاني لموضوع الوظيفة ده ولا لا تاني

حقيقي نفسي اتسدت

واللي حصل معايا بعد كده يحرق الدم

مش شايفه انه حاجه هتضيف لو اتقالت

بس الاكيد انه لو فيه اضافة في يوم من الايام هرجع هنا تاني

كتوثيق

مين عارف كمان سنة ولا اتنين ايه اللي ممكن يحصل او يكون حصل

بس اللي فعلا نفسي ميحصلش ابدا

اني اكون من المتقولبين

ادركت اني اكاد اكون منهم ولكني لحقت نفسي علي اخر لحظة الحمد لله

وربنا يستر





9 التعليقات:

salma mohamed يقول...

فين الحلاوة،يعني مرتب ومكافأة ومن شوفش خيرهم :))

كلمات من نور يقول...

كفارة يا فتاتي من القولبه .... ربي يكرمك يارب ويوفقك لما يحب ويرضى ...تحياتي

مستكه يقول...

يا سلام يا ست سلمي

بس كده

طب تعاليلي انتي وانا هنغنغك

وهفسحك واجبلك هدايا

وانتي مروحة هديكي سرر من الدنانير

بس انتي تعالي ومالكيش حجة

مستكه يقول...

كلمات من نور

ربنا يكرمك ويعزك يارب

الحمد لله ربنا يعافينا يارب مما ابتلي به غيرنا

دعواتك

لجين أبو الدهب يقول...

مستكة حبيبتتتتتتتتتى ,,

تعالى حطى همك على همى ونفتح مدونة عن التعليم وسواده

حاسة بيكى طبعاااااا جدااااااافى كل حاجة كتبتيه انا قرأت من اول بوست سنة اولى وظيفة

وكل الكلام اللى بتقوليه صح 100فى 100

وخاصى تصنيف الزملاء ..

صنفتيهم بالظبط والله العظيم ..

وعلى الاقل انتى اخدتى 145 اول مرة

انا الراتب كان 80 جنيه :(

لانى مدرسة بالاجر ..

والامتحانات دى بجد والمراقبىة عليها هى اللى كشفت لى احنا ليه شعب رجعى لغاية دلوقتى واننا هانفضل طول عمرنا ورا لو فضلنا كده

انا اللى مخلينى متمسكة لغاية دلوقتى الولاد بس وحبى ليهم وحبهم ليا
دول بيكتبوا لى جوابات بتأثر فيا اوى والله

بس بفكر جديا اسيب بعد السنة دى ..
هاقول ايه ولا ايه

جيتى على الجرح يامستيكو

اقول ايه بقى لنا الله D:

كلمات من نور يقول...

عيد سعيد يا مستوكه .....فين الغياب لسه فرحانه بأول راتب؟؟؟؟

ههههههههههههههههه

elsha3er يقول...

ندعوكم للمشاركة معنا فى جروب للمدونين على الفيس
http://www.facebook.com/home.php?sk=group_150308615029590#!/home.php?sk=group_150308615029590&ap=1

واحد من العمال يقول...

فعلاً كلامك صحيح وكل ده لأن التعليم عندنا ديكور
يعنى أهو عندنا مدارس ومدرسين ونظار وطلبه ولم تبقى وزاره التعليم وزاره مهمه ولا سياديه حتختلف الأوضاع والأحوال لجميع مكونات العمليه التعليميه
وكمان ساعتها حيكون المنتج النهائى حاجه تشرف وتتقدم بالبلد
والمرتبات كلها فى الحكومه تعبانه ومبتكفيش فعلاً ولازم مساعدات أبويه وأخويه كمان أما بالنسبه للقولبه حتتقولبى اليوم أو غداً أو بعد غد

وتهانينا بأول مرتب

غير معرف يقول...

WOW just what I was searching for. Came here
by searching for 24 hour heating and cash for cars
las vegas nv

My web site; 24 hour heating and cooling repair las vegas nv