١١:٣٢ م

انفلونزا يافايزة




دراسة يا دراسة بأي حال عدتِ يا دراسة

بدأ العام الدراسي الجديد وكله مخاوف وقلق وحذر

بسبب وباء انفلونزا الخنازير (H1N1)

بصراحة المخاوف في محلها ويجب ان تزيد كمان

فمن خلال التجربة السابقه لانفلونزا الطيور وتوطن المرض في مصر

يجب ان نهلع من انفلونزا الخنازير لعدة اسباب اهمها :

- طبيعة الفيرس المختلفه عن انفلونزا الطيور وسرعة انتشاره

- طبيعة الحكومة في ادارة الازماات (ريما وعادتها القديمه )

- عدم الوعي علي الرغم من الحملات الصحية المنتشرة

- طبيعة المواصلات عندنا وما ادراك ما المواصلات


صحيح العام الدراسي بدأ والمخاوف بدأت إلا إن الأسوأ لم يأتي بعد ....


من خلال مشاهداتي لإستعدادات وزارة التعليم والصحة ومتابعة الكاميرات لاول يوم دراسة لاحظت التالي :


1-الاهتمام كله توجه للمدارس واستعدادتها وتم التجاهل التاااام لوسائل النقل والمواصلات اللي نسبة التزاحم فيها قادرة تماما علي نشر الوباء في جمهورية مصر العربية في نص ساعة بس ^_^


2- ان فيه مدراس التزمت جدا بالتعاليم والارشادات الوقائيه


3- فيه مدارس التزمت ولكن بشكل اعلامي اكتر منه وقائي ( زي المدرسه اللي زارها مسؤل واتصورت وكانت ميه ميه بس اول دورين بس انما الدور التالت والرابع متكنسوش حتي )


4- ان المفروض ان الوزارة وفرت ادوات نظافه وتعقيم وموصلتش لكتير من المدارس ( راحت فين !!!)


5- ان الاهالي دايما متزمرين ومش بيعجبهم العجب


وبصراحة دي نقطة لازم نقف عندها شوية كتير ...


ا- شفت ناس معترضه علي تقسيم اليوم الدراسي صباحي ومسائي بحجة انهم في الشغل وهيودوا الاولاد فين !!


ب- وناس تانيه معترضه علي نظام التلات ايام وان الاولاد هينسوا اللي اخدوه في المدرسه في الايام اللي هيعدوها !


ج- وناس تانيه معترضه ان الاولاد هيجيبوا ادوات النظافه من معاهم او انهم هينضفوا المدرسة .


في رايي الشخصي بصرف النظر عن اداء الحكومة في التعامل مع الازمة الا ان دور المواطنين فعلا سلبي ومخيب للامل ليه ؟؟


اولا الناس اللي معترضه عن تقسيم الايام واختلاف اوقات الدراسه وكل واحد بيدور علي ظروفه هو ياجماعة احنا في أزمة يعني لازم نتصرف واللي عنده مشكله في المواعيد يشوف مدرسه ملائمة لظروفه او الاولاد ياخدوا السنه دي منازل , مش مشكله نهائي وبلاش نضحك علي نفسنا ونقول انهم لو مش حضروا مش هيفهموا والكلام ده لان انهارده محدش مش بياخد دروس


ثانيا : ايه يعني اما كل تلميذ ياخد في شنطته صابونه ومطهر علي ما المدرسه يجيلها او ميجلهاش ونبقي نعمل استجواب في الموضوع ده بعدين بس نمشي امورنا الاول


ثالثا : ليه معترضين ان الولاد ينضفوا فصولهم ! ليه هو مين اللي رمي الزباله مش هما ؟

علي الاقل يتعودوا علي سلوك حضاري ويتعلموا ان النضافه من الايمان وان مش عيب انهم ينضفوا مكانهم

انا عن نفسي اللي بنضف مكتبي وده مش عيب ابدا ولا ينقص من برستيجي لاني لو انتظرت العامل عمر المكان ما هينضف غير ان المدارس فيها فعلا نقص عماله ( مش بدافع عنهم بس اهو حل مؤقت وايد علي ايد تساعد )

ومش بقول برضه ان الاولاد يشتغلوا عمال نظافه وينضفوا الحمامات ويتردموا تراب من الكنس لا يعني نضافه في حدود المعقول


ياجماعة والله دي ازمة

فيه وبااااء

كلمة وباء دي مش سهلة ولا بسيطة ولسه شهور الشتا جايه والله اعلم ايه اللي هيحصل فيها


ربنا يستر علينا كلنا ويحمينا من الامراض


دي كانت ملاحظاتي علي الاستعدادات في المدارس

المره الجايه ان شاء الله نتكلم عن الجامعات واللي جاري فيها


وربنا يستر

4 التعليقات:

الفقيرة إلى الله أم البنات يقول...

بصراحه موضوعك رائع
وفعلا عندك حق بخصوص المواصلات
والاهالى والحكومة
ااقول ايه يا مستوكه الموضوع اكبر منا
بس ان شاء الله هتعدى على خير
مصر مقبرة الامراض
يا اما تقضى عليها.زيا إما ياخدوا على بعض ويحصل نوع من الاستئناس
متقلقيش يا ميس


فالله خير حافظ..خلاص لم يعد باليد حيله

مستكه يقول...

ازيك ياطنط منورة المدونة

هو فعلا الموضوع كبير ربنا يستر بجد

بس مش موافقاكي ان مصر مقبرة الامراض

دي مصر مضيفة الامراض لان المرض اللي بيدخل الصراحة بيعجبه الجو ويقرر يستوطن وياخد الجنسيه

حضرتك مش واخدة بالك ولا ايه من قائمة الامراض الطويلة العريضه

عموما انا مش قلقانه لاننا في كل الاحوال ميتين

تعددت الاسباب والموت واحد

معدتش فارقه


ملحوظة :

طنط هو بلوجر كله خرف ولا مدونتي بس ؟!

فيه حاجه غلط بتحصل *_*

شريكة في المطعم يقول...

الموضوع رائع ومهم جدا..
والمدونة ككل شكلها لذيذ..
نرجع للبوست بقى ..
بجد ربنا يستر ..لأن الموضوع كبير فعلا
والناس واخداه ببساطة جدا..وفي الي يقولك احنا مالنا هو احنا بناكل خنازير !!!الجهل موجود برده
ده اذا كان انفلونزا الطيور الي معظم البلاد خلصت منها ..لسه في حالات بتموت منها هنا ،ده غير الي اهاليهم مش بيبلغوا اصلا ..
بس نرجع للانفلونزا الجديدة !!
اهو كل يوم بيكتشفوا حالات في المدارس
بس يعني هي العدوى مش موجودة غير في المدارس بس !!
واصلا مش كل الدكاترة بيروحوا..ولما يروحوا كل طالب يعمل نفسه تعبان عايز يروح ..والي تعبان بجد ويروحوه..اهله ميجيبوش له الدواء سواء حرارة مرتفعة او برد او غيره..ييجي تعبان تاني ..يروحوه ..أهله يزعأوا ..هيتعلم ازاي..
الحكاية ماشيه كده بالعافية..
وربنا يستر..

مستكه يقول...

يااهلا يا اهلا بيكي يا شريكة المطعم

زعلت جدا علي فكرة لما عرفت انكم قفلتوا المدونة

بس فرحت لما اتفتحت تاني

يمكن انا مش متابعه اوي الايام دي لانشغالي الشديد بس المهم انكم تكونوا موجودين

بالنسبه لموضوع الانفلونزا المشكله بجد انه المفروض قبل ما يكون عندنا وعي صحي ووعي بالمرض نفسه

لااااازم يكون عندنا وعي بحاجة اسمها الازمات وكيفية التعامل معها وتقبلها بالشكل المعقول

يعني رد الفعل يكون متوازن مش فزع وهلع وولا برود و لامبالاه

وبرضه التحمس الزايد عن حده واللي بينقلب للعكس بعد كده بفترة بسيطة

المفروض كلنا يكون عندنا وعي متوازن بالازمة وابعادها بوضوح وصراحة لان التعتيم في الحالات دي اضراره اكتر بكتييييييييييييييير من منافعه

وربنا يستر علينا كلنا , والمرض ميستوطنش

اصل مصر بلد مضياف !