اول مرتب

ونكمل من تاااااااااااااااااااااااااااني المشوار




خلصنا في البوست اللي فات انواع زملاء العمل




انهارده عايزة اتكلم عن اول مرتب




تجربة رااااائعة


انك تعرف قيمة الفلوس


انك يكون معاك فلوس بتاعتك مش من حد انت اللي تعبت فيها


والله احساس قمة الجمال


بصرف النظر عن قيمة الفلوس وعددها الاحساس جميل جدا


تيجي بئه بعد النشوة والسعادة والانشكاح انك بئيت حد بيجيب فلوس من نفسه


مش عايشه عالة علي كل خلق الله


هتحس بالصدمة


زي بالظبط عملية البسترة بارد وسخن في نفس الوقت والله ينور


الصدمة بئه في قيمة الفلوس


وهتلاقي نفسك لااراديا بتردد الاغنية الشهيرة للاخ ابو جريشة


" 145 جنيه هعمل بيهم ايه ولا ايه ...."


وساعتها ايقنت انه لامفر من طلب الدعم المادي من والدي وخصوصا بعد ما زادت المسؤليات


يعني خروج كل يوم بسلطاته وباباغنوجه هيحتاج مضاعفة الدعم المادي

والجميل في الموضوع حكاية المكافئة

اللي امة لا اله الا الله بتكون نبراها ومنتظراها

يعني من اول مدير المدرسة وهو بياخد منك قبل ماتقبض رسوم التلفونات وكيت وكيت

لحد بياعين الفاكهة والخضار

اللي لو تكلمت معاهم في اي حاجة يقولولك كل سنة وانت طيب

وكل مكافئة وانت طيب

واللي الحمد لله مبتعدش اصلا وبتتبخر زي اي حاجة في حياتنا ما بتتبخر

ده كان بالنسبة للمرتب


نيجي بئه لمتاعب المهنة


ومتاعب المهنة بالنسبة لي غير اي حد في نفس المهنة

غير طبعا مشكلة الصحيان بدري


ازااااااااااااااااااي


انا هقولكم


اول ما اشتغلت اخدت دور حصبة الماني محترررررررررم




وكنت انا الوحييييييييييدة في المدرسة اللي تعبت




يعني ولا طالب ولا طالبة اخدو الدور ده


بيتهيألي لانهم اتطعموا وانا لا ):


وعلي التعليقات اللي اخدتها بئه واللي كانت اهمها :


"بدل مانحط اسمك في المكافأت هنحطه في التطعيمات "


" خلصي الجدري وتعالي "


" طب المدرسة لما تحصب الطلاب يعملوا ايه "


وكان دور دور


الله يعين الاطفال بيتعبوا فعلا !!




تالت حاجة عايزة اتكلم عنها الامتحانات


وما ادراكم ما الامتحانات


وكنت كتبت عنها قبل كده في مدونة فخفخينا ياريت تقروها هناك

بس الله يكرمكم تعلقوا هنا عشان معدتش بعرف ادخل هناك








يوميات مراقب







وبجد الامتحانات دي بيحصل فيها حاجات غريبة

انا لما كتبت ملاحظاتي عنها كان في اول مرة اراقب فيها

انما بعد كده فهمت شوية العملية ماشية ازاي

ومقدرش ادين المدرسين او القائمين علي الامتحانات

فعلا الل بره الموضوع غير اللي جواه

وقوانين التعليم المفروض لا توضع تحت بند قوانين التعليم لأ

دي توضع تحت عنوان صدق او لا تصدق

مش هطول عليكم ما احنا فعلا في بلد العجايب

يلا بجملة عجيبة من العجائب

مش عارفه هرجع تاني لموضوع الوظيفة ده ولا لا تاني

حقيقي نفسي اتسدت

واللي حصل معايا بعد كده يحرق الدم

مش شايفه انه حاجه هتضيف لو اتقالت

بس الاكيد انه لو فيه اضافة في يوم من الايام هرجع هنا تاني

كتوثيق

مين عارف كمان سنة ولا اتنين ايه اللي ممكن يحصل او يكون حصل

بس اللي فعلا نفسي ميحصلش ابدا

اني اكون من المتقولبين

ادركت اني اكاد اكون منهم ولكني لحقت نفسي علي اخر لحظة الحمد لله

وربنا يستر

3- زملاء العمل

اول مرة شغل



كلمة بتشيل وراها اعباء كتيرة جدا



اولا : طريقة التعامل مع زملاء العمل واللي تختلف كليا عن زملاء الدراسة لان زمايل العمل مختلفين من حيث الثقافه والتعليم والاتجاهات والسن وكل حاجه مهما كانوا في اطار عمل واحد الا انهم مختلفين جدا وخصوصا في مجال التعليم لاختلاف وجهة تخرج كل واحد .





ثانيا :العمل واللوائح والفجوة الشديدة بين المفروض والواقع والصدام بين الموظف الجديد بكل مثله وحماسه في تطبيق الشغل باساليب حديثة وبين النمطية والروتين والتقليدية في العمل



ثالثا :معرفة حقوقك في العمل





بالنسبة للتعامل مع زملاء العمل فهناك نماذج هتلاقيها في اي شغل فمثلا فيه

- الزميل \ ة الحشري : اللي عايز يعرف عنك كل صغيرة في حياتك قبل الكبيرة اللي بيسأل انت منين وفي اي منطقة بالظبط وساكن في الدور الكام ولك كام اخ واخت ووالدك ووالدتك وكلية ايه ودفعة كام وبتقبض اد ايه وفطرت ايه انهارده o _0



- الزميلة الرغاية : اللي بتيجي تعد معاكي في المكتب وتحكي قصة حياتها بمجرد تقوليلها صباح الخير وتعطلك عن شغلط



- الزميل \ة الفهامة : الي هو عارف كل حاجة المفتي اللي بيدخل في اي موضوع ويتكلم فيه وكانه عالم فيه في الفن في السياسة في العلم في اي حاجه تلاقيه فايت وكمان بيعدل علي كل اللي حواليه وعلي رؤسائه وعامل فيها ابو العريف وهو اصلا غلبان في حاله ولا عارف حاجه



- الزميل \ة صاحب الصوت العالي : وده اي حد يكلمه او يعطيه حصه احتطياتي تلاقي صوته جايب لاخر المدرسه ودايما بيزعق مع زمايله ومدريه ولو فيه لجنة زائرة مفيش مانع انه يجادل معاهم النوع ده بيغلط في الناس في وشهم مش من وراهم ممكن يكون لسانه طويل والناس بتعمله حساب مش احتراما ولكن تجنبا للتعامل معاه اصلا بس غالبا بيكون واخد حقه كويس ودايما بيكتب شكاوي ^_^



- اهل البر والتقوي : ودول يبدو عليهم الهدوء والطيابة ولهم كلاام مع كل الناس خمس دقايق في كل مكتب كفيلة بنقل الاخبار من اول المدرسه لاخرها بحسن نية او سوء المهم ان النتيجة بتكون واحدة وهي تهدية النفوس علي الاخر والنوعية دي كفيلة بقطع العلاقات واحيانا بنطلق عليهم الخمسة شعلة



- متصيد \ة الاخطاء : وده حد كل شغلته في الحياة يتصيد الاخطاء لزمايله وخصوصا في مجاله تحديدا ودايما يحب يظهر نفسه متعاطف معاك ومفيش مانع ابدا لو ساعدك في الشغل بطريقة غلط عشان يورطك اكتر



- البخيل \ة : وده حد دايما يحب يبرشت علي زمايله ويستغل الفرص في توصيلة او عزومة لو حتي قلم حبر المهم مش يسيب اللي قدامه اللي وهو واخد منه حاجه *_*



- الزميل \ة الخدوم : وده بيكون اجمل حاجه لما تلاقي زميلة زي اختك بتسد عنك في غيابك وكانك موجوده وبتنصحك وبتشجعك وبتأزرك في مواقف كتيرة والحمد لله فعلا من اجمل الحاجات اللي حصلتلي اني قابلت ناس كده واعتز جدا بصداقتهم الي الان .



- الزميلة الغيورة: ودي اللي تحب تكون افضل واحدة شكلا وموضوعا وتموت لو شافت واحدة لابسه افضل منها او حد اخد منها الاضواء سواء شكلا او موضوعا .



وفيه الناس الطيبه اوي اللي من كتر طيابتها بيستضعفها اللي حوليها وبيستغلوها للاسف !



ودي نماذج علي سبيل المثال لا الحصر



بالنسبة لثانيا بئه ودي مشكلة المشاكل ... انك تكون لسه متخرج وكلك حماس عشان تعمل حاجه وتستغل موقعك لخدمة الناس اللي حواليك وكل حاجة حولك بتحبط حماسك ده اما الظروف او الماده او الاشخاص اللي حواليك وخصوصا الناس الكبيرة لانهم بقالهم سنين طويلة بيشتغلوا باسسلوب معين مش علي اخر الزمن شوية عيال لسه متخرجين امبارح هعدلوا علينا ( ودي طريقة تفكيرهم فعلا )



حتي لو حاولت تشتغل في الظروف دي وفي الامكانيات المتاحة وبنفس الحماس هتواجه مشكلة اكبر وهي البيروقراطية الممله دا غير ان فيه حقيقة اي انسان بيشتغل في قطاع حكومي يدركها تماما وهي الاهتمام بالكم اكتر من الكيف .



فمثلا الهدف الاساسي من وجود مكتبة في اي مدرسه هو تثقيف التلاميذ وتشجيعهم علي القراءة



وده هدف طبيعي جدا ومشروع انما اللي مش طبيعي ابدا انهم يحاسبوني علي اعمال ادارية بحتة ويهتم بها جدا اي موجه او زائر علي حساب الهدف الاساسي للمكتبة , حاجة تانيه المكتبة لها حصص والحصص دي انواع منها حصة قراءة موجهة (اني اقرا قصة للتلاميذ) وقراءة حرة ( ان يقرؤا ما يختاروه من كتب ) ومهارات مكتبية ( تعريف بالشغل الاداري والفني الخاص بالمكتبة ) .



ودي حاجة كويسه , انما اللي مش كويس ابدا ان المقرر يكون كل الحصص مهارات !!!

طيب الولاد تقرا امتي !! والمكتبة موجوده ليه ولازمتها ايه !!!



دي بجد من المفارقات اللي هتجنني لحد انهارده , والمشكله ان الادارة العليا للمكتبات عارفه ده وعارفه ان معظم انشطة المكتبة لاتدار بالشكل المطلوب نتيجة الضغوط اللي واقع فيها الاخصائي ومع ذلك مستمرين في قرارتهم العقيمة , وعلي فكرة ده مش خاص بالمكتبات بس في كل مجال هتلاقي مثال علي ده



فبنلاقي مشكلة جامدة فعلا بين الواقع والمفروض , ومع مرور الوقت غصب عنك بتلاقيك بتتقولب زي اي موظف كنا بننقده زمان وتلاقيك محصور في قالب كل يوم بيديق عليك بسبب ضغط النشرات واللوائح العقيمة



بالنسبة لرابعا بئه ودي مهمة جدااااا



لازم اي حد لما يجي يشتغل يكون مدرك تماما لحقوقه وواجباته عشان محدش يستغل جهله بالموضوع ده , بتكلم عن تجربه لاني كنت راحه اشتغل ومعرفش اي حاجه عن الشغل لدرجة اني مكنتش اعرف مرتبي كام ولا ظروف التعاقد ايه ولا اييييي حاجه خالص



وطبعا كل الناس كانت بتستغل الموضوع ده انهم يكلفوني بحاجات مش تخصصي اصلا ولو اتكلمت يبقي احنا هننهي عقدك او مش هنكتب فيكي تقرير كويس حتي مكتب التوجيه المفروض انه اللي بيفهمني شغلي وبيحميني كانوا اول ناس بتستغل النقطة دي



وكنا عاملين زي تلاميذ سنة اولي كل مانعمل حاجه يقولونا هنحطكم في اوضة الفيران , واحنا ولا عارفين حاجه ومعذورين لان محدش فهمنا ولا بصرنا بحقوقنا اللي تحفظ لنا وضعنا في الشغل .



لذاك نصيحة كل واحد او واحده اشتغل جديد يقرا قانون العمل الخاص بيه عشان مش اي حد يقول اي كلام ويكون عارف ايه اللي ليه وايه اللي عليه ولاحد يكلفه بحاجه مش من صلحياته ويدخله في مشاكل مالهاش لزوم







لسه الكلام منتهاش انتظروني

الحلقة التانية

طب ليه اشتغل
بعييييييييييييييييييييييييد لما ممكن اكون قريب

لا هو كده ومفيش غير كده

اوك اجررررررررررب

وتوكلت علي الله وعزمت

وقفنا البوست اللي فات اني عزمت وتوكلت

بس نسيت اقول حاجه مهمه هي طبيعة الوظيفه

انا اتعينت اخصائية مكتبة

وكنت فرحانه اوي بالموضوع ده لاني مش بعرف اعمل حاجه في حياتي اد القراية

ومن صغري وانا في المكتبات

اخيرا ياربي هشتغل حاجه بحبها معقولة دي !!

عشان كده تغاضيت مؤقتا عن موضوع مكان المدرسه وظروف الوظيفه

وقبل ما امشي من مكتب التوجيه قالتلي المديرة لسه حاجه صغيرة بس هتعمليها عشان ورقك يكمل هتعمليها وتجبيهالي خلال 15 يوم

( معقول بعد كل الاوراق والامضاءات اللي عملتها لسه فيه )

قلتلها خير !

قالتلي عايزين فيش

ايه الفيش ده

دي ورقة هتخلصيها من قسم الشرطة اللي تابعه منه

ياربي انا علي اخر الزمن هدخل قسم !!!!!!

روحت قلت لبابا تصدق يابابا طالبين منا كعب داير o_0

وفييييييين علي مافهمت ايه الفيش ده واللي في رايي مفرقش كتير عن الكعب الداير *_*

المهم ناس كتير اعدو يوصفولي المدرسه اللي هروحها دي فين واركبلها منين واوصلها ازاي

وتاني يوم ذهبت الي المدرسه باكرا

الساعه 10 كده

ماهو ده بدري جدا بالنسبه لي

وكان احساس غرييييييييب

المدرسه كانت في الارياف واي حد غريب بينزل بلد ريفيه بيكون معروف انه غريب

فالناس بيكون عندها حب المعرفه والفضول ده مين وليه وفين وعشان ايه

وده اللي لمسته من لحظة ما ركبت العربية اللي هتوصلني للبلد

وخد عندك بئه اول ما دخلت المدرسة اي حد يقابلني انتي مين وعايزه ايه

ياجماعه عايزة المدير

ايوة يعني انتي مين

حوالي خمستلاف شخص قابلني قبل المدير

واول مادخلت حجرة المدير كنت مقررة جدا اني هستقيل قبل ما امضي استلام العمل

قابلني شخص في حجرة المدير قالي نعم

( نعم ايه انا جاية اشحت منك )

قلتله حضرتك انا اخصائية وجايه استلم

قالي احنا مش محتاجين

(يانهارك زي بعضه بتقولي مش محتاجين !! )

وفي منتهي التحدي قلتله طب حضرتك اكتبلي ورقة بالكلام ده وانا هاخدها للادارة التعليمية وابلغهم بامتناعك

وطبعا استلمت ومضيت حضور في نفس ذات اللحظة

وقالولي روحي دلوقتي بئه وتعالي بكرة تكوني هنا الساعه 7 ونص صباحا

وكانت دي اكبر مشاكلي في الموضوع اني اصحي بدري ودي كانت كارثة بالنسبة لي

وتغلبت علي المشكلة دي بأني كنت بطبق اليوم وانام بعد ما ارجع من المدرسة وفضل يومي مقلوب كده لحد ما كل شيء اتظبط وبئيت انام من الساعة 8 مساءا زي الفراخ

وكان اول مرة ادخل فيه المكتبة واعد علي مكتب كان احساس جميل ومخيف في نفس الوقت

اول مرة اكون في مكان لوحدي من غير صحباتي ومعرفش حد خالص في المدرسة الا الامين اللي معايا

كنت طول الوقت اعدة ماسكة في ايدي كتاب وبقرأ تقريبا قريت نص كتب المكتبة في اول اسبوع

وكنت فاكرة ان الشغل كده وخلاص

لحد ما الامين فهمني ايه شغل المكتبة وعرفني يعني ايه اخصائية وايه مهامها واول حاجة فزعت لما عرفتها اني ليا جدول حصص واني هدرس حاجات للطلاب .

وطبعا دي كانت مصيبة بالنسبة لي خصوصا لما اكون خجولة وبغرق في شبر مية بالاضافة الي ان المكتبات مش تخصصي ومدرستش تربوي عشان اعرف اتعامل مع الطلاب !!

اتفقت مع الامين انه اللي يعطي الحصص مبدأيا علي ما افهم الموضوع وكنت براقبه هو بيمشي الموضوع ازاي

وعمري ما انسي اول مرة ديرت فيها فصل لوحدي كنت برتعش وصوتي مش طالع خالص

بعد كده لئيت الموضوع لذيذ اوي وده اللي خلاني مفكرش اسيب الشغل بعدها

والصدمة التانية ان شغل المكتبة مطلعش قراية ولا توزيع كتب علي الولاد

دا طلع 25 سجل

اي نعم انا مسؤلة سجلات ودفاتر كتيرة اوي والمفروض بشغل كتير منها يوميا !!

محاضرات - مناظرات - مسابقات - ندوات - استعارة - احصاء شهري - يومية مكتبة - مترددين - اذاعة - معارض -موهوبين - مهارات - قراءة حرة - قراءة موجة - خدمة منهج - برنامج زمني - نشاط فني - كل ده غير الاعمال الفنية من فهرسة وتصنيف وقوائم ببلوجرافية *_*

انا المفروض اعمل كل ده !!!!!!!!!!!!!

بس اكتر حاجة تخنق في الموضوع حكاية اول مرة اشتغل

كلمة اول مرة دي بتشيل وراها حاجات كتيرة اوي

اللي رايح والجاي بيسأل في حاجات مالوش فيها خالص وعشان انا جديدة ومعرفش فاكرة ان ده العادي وان كل الناس عارفه عن بعضها كل حاجة بحكم شغلهم في مكان واحد

وعشان كده قررت اعمل بوست مخصوص للناس اللي اول مرة تشتغل تتعامل في المواقف اللي زي دي ازاي .

انتظروا البوست الجاي ان شاء الله

سنة اولي وظيفة

الموظفون في الارض



بصراحه مكنتش دايما بتعاطف معاهم



وكنت بشوف انهم بيقصروا في شغلهم واذا جاز التعبير بيستهبلوا



لكن نظرتي اتغيرت كتييييير عن الاول



متغيرتش للاحسن ولا للاوحش



بس الاكيد انها اتغيرت



وبما اني موظفه فالموضوع مينفعش يمر كده



ابداااااااااا



لازمن حتمن احكي رحلتي مع العذاب



قصدي مع الوظيفه



صلوا بينا عالنبي



اللهم صلي عليك يانبي



انا مكنش من طموحاتي ابدا اكون موظفه



وخصوووووووووووووووصا في التربيه والتعليم



بس ساعات بتحدفنا الاقدار علي حاجات منتوقعهاش



المهم



في يوم من الايام وانا اعده في امانة الله ولابيا ولا عليا



قالولي في مسابقه قدمي



وبصراحه كان عاجبني اجرب موضة المسابقات دي من باب التغيير وقدمت



وقالولي هنبقي نتصل بيكي



وانا لمدة اسبوع كنت عامله زي عبده مشتاق بنام والتلفون في حضني



وطبعا مرنش ولا رنة



ومر اسبوع في شهر في سنه ونسيت كل حاجه



لحد في يوم لقيت اتصال وحد بيقولي عايزينك في الادارة التعليمية بكره



بصراحه شكيت انها اشتغاله هو ينفع !!



قلت يابت مش مشكله ماهو يوم الحكومة بسنه



هروح ومش هخسر حاجه



رحلة العذاب والضنا ...



صحيت تاني يوم من النجمة الساعه 11 كده وجريت علي الادارة اشوف ايه الموضوع



وهناك رأيت مالاعين رأت ولا أذن سمعت ( كنت فاكره كده بس فيما بعد عرفت انه الطبيعي )



دخلت مكتب فيه ناس كتير وعرفت فيما بعد انهم مش زائرين دول العاملين في نفس ذات المكتب



والغريب ان كووووووولهم سيدات مفيش ولا راجل واحد فيهم



وانا راحه اصلا وناوية مش هشتغل اكتر من شهر دا لو اشتغلت كنوع من التجربه ليس اكتر



دخلت عليهم وبكل ألاطه سألت عن المطلوب



وكان المفروض اني اجيب امضاءات وموافقات واقرارات وحاجات غريبه كده كاني هشتغل رئيسة دولة مش في مدرسه



ووصفولي اخلص الورق منين والخطوات اللي هعملها



كنت فاكره انه نص ساعه وكل شيء ينتهي



معلش ياجماعه كنت لسه علي عمايا ومش عارفه حاجه



طبعا مخلصتش حاجه يومها عشان كان الوقت اتأخر فكان لازم افضل مطبقة اليوم ده عشان الساعه 8 صباحا انزل اكمل الورق



وكان يوم



اروح هناك يقولولي هنا اجي هنا يقولولي هناك



اخر دوخه , وصوري وامضي واختمي



واخييييرا خلصت او هكذا اعتقدت



لحد ما رجعت لمدام فلانة في الدور التالت وطلبت مني امضاء بالقلم الاخضر من ادارة تانيه بعيدة حوالي كيلو من المكان اللي انا فيه



طب ليه حضرتك مقلتليش ماانا كنت هناك من شويه



وانا اعرف منين انك متعرفيش



ليه هو حد قال لحضرتك اني اشتغلت وزيرة قبل كده



( وكان نفسي اخنئها واخلص منها البشرية )



ورجعت تاني ومضيت باللون الاخضر ورجعتلها قالتلي هاتي منها بئه نسخه



اه يابنت اللذين



ما انا كنت تحت مقلتيش ليه لسه هنزل مشوار عشان التصوير



امرنا لله



طبعا غير الطوابع والقص واللزق اللي مالوش اي لازمة



وفي الاخر قالتلي دلوقتي بئه هتروحي الاداره يوزعوكي



بصراحه وانا ماشيه كان نفسي افجرها



ورحت الاداره ( لازم في مره هحكيلكم شكل المكاتب هناك ازاي )



انا ساكنة في شارع بين شارعين كل واحد فيهم فيه مدرسه كنت مسستمة نفسي علي واحده فيهم



علي اساس اني هختار المدرسه اللي هروحها ( مش بقولكم كنت علي نياتي اوييييييييييييييي)



ولما جيت اتوزع قالولي هتستلمي في مدرسة (......)



والمفاجئه ان مدرسة (.....) مش في المدينة اللي انا انا فيها اصلا







طب ليه اشتغل بعييييييييييييييييييييييييد لما ممكن اكون قريب



لا هو كده ومفيش غير كده



اوك اجررررررررررب



وتوكلت علي الله وعزمت







تابعوني في البوست الجاي في الحلقه التانيه من يوميات سنة اولي وظيفة

الف مبروك مالا نهاية

السلام عليكم ورحمة الله وبركاته

البوست ده تهنئه بمناسبة زواج صديقتي وحبيبتي

راندا رأفت صاحبة مدونة مالانهاية

علي د/ محمد سرحان النقشبندي

اجمل باقة ورد

الف مبروك

ربنا يسعدكم وريوفقكم في حياتكم الجديده يارب

ويرزقكم الذرية الصالحه ان شاء الله

كل سنة وانا طيبة

السنة اللي فاتت كتبت البوست ده :

مارس

السنة دي مختلفة كتير عن السنة اللي فاتت بجد مش لاقية كلام

بس الاكيد انها مختلفه شكلا ومضمونا عن 2009

احب اعبر عن السنة دي بكلمات بلاك تيما ...

راح الصبر ورجع الصبر .... وتعب القلب ولسه كتير

اه يا تي شيرت العمر يا ابيض .... لفيت بيك مشاوير مشاوير

أملك صوره انا فيها صغير ... شكلى اتغير معرفتوش

كان فى جيوبى مكعب سكر .... داب السكر ملقتهوش

واما اتقطعت منى الساعه .... وقع الوقت لقتنى كبييير

اعرف واحد قال لواحد .... اهمل صاحبك واقسى عليه

واحد قال لواحد نفسه .... انت مزعل صاحبك ليه

واحد حاول يعرف واحد .... طلع الواحد صفر كبييييييييييييييييييييييييير

_____________________________________

السنة اللي مرت دي اكتشفت حاجات كتيرة اوي

وعرفت كتير

واكبر درس اتعلمته ... ان كل ما تعرف كل ما تزيد همومك كل ما تقل ثقتك في اي حاجه

هي اغمقت كده ليه !!

انا بهديني باقة ورد لان الورد اجمل حاجه في الدنيا

وادي تورتة عيد ميلادي ...

وبشكر ربنا علي اصحابي اللي انعم عليا بيهم

اللي اسعدوا قلبي بمكالماتهم او رسايلهم

كمان الحمد لله اني عرفت الصحاب اللي بجد من الصحاب اللي بتدعي الصداقه

الحمد لله علي نعمة الاهل

رسالة اخيرة لمستكة ياريت تراجعها السنة الجاية ان شاء الله .....

ياريت ترجعي مستكة بتاعة زمان *_*

العولمة في غياب المضمون

طبعا موضوع العولمة ده قتل نقاشا ولكن المؤسف في الموضوع ان الكثير الي الان غير ملم بأبعاد الموضوع وخطورته

يمكن بسبب استخدام الكتاب والمفكرين مصطلحات معقده بعض الشيء

ويمكن لانبهار الاجيال الجديده بالثقافه الوارده والفرق الحضاري الشاسع بين ثقافتين او حضارتين

فضلت نتكلم في المقال ده عن العولمة والهويه الثقافيه بشكل بسيط وسهل ونلقي الضوء علي خطورة الموقف ان لم نتنبه لذلك

وقبل الخوض في اي حديث يجب ان نعرف اشياء ثلاث اساسيه وهي :

معني العولمة

ماهي الهوية

وتعريف الثقافه

ومن ثم الربط بينهم ومعرفة طبيعة العلاقة بينهم

العولمة :

هناك العديد والعديد من المفاهيم للعولمة كل مجال من وجهة نظره هناك مفهوم من الوجهه الساسيه والاجتماعيه والثقافيه والاقتصاديه ...الخ

لكن يمكن تعريفها بشكل بسيط جدا بانها :

" هي مجموعة التطورات والمستجدات التي تهدف بقصد او بدون قصد لدمج سكان العالم في مجتمع عالمي واحد "

الهوية :

"هي مجموعة السمات المميزة للشيء والتي تجعله هو هو بحيث يمكن تميزه عن غيره من الاشياء "

الثقافه :

"هي ذلك الكل المركب الذي توصل اليه الانسان بيده او بعقله في ماضيه او حاضره "

الهوية الثقافية :

"هي مجموع السمات المميزة للأمة مما يحفظ لها شخصيتها عبر العصور "

ومن التوضيح السابق نجد ان الهوية تعني التميز والذي عكسه التنميط والقولبه

والهوية الثقافيه لاي مجتمع هي التي تميزه عن غيره من المجتمعات وتحفظ شخصيته مثل لغته وتاريخه وعاداته وتقاليده وقيمه الاجتماعيه والدينيه وثقافته ....الخ

واي ثقافه لها محتوي يتكون من ثلاث :

1- عموميات : وهي مايشترك فيها جميع افراد المجتمع مثل اللغه والعادات والتقاليد .. الخ وهذه العموميات هي الاساس العام لثقافة اي مجتمع

2- خصوصيات : وهي يشترك فيها مجموعه معينه من افراد المجتمع دون غيرهم وهي نوعان :

أ- خصوصيات مهنية : وهي يستلزم لممارستها مهارات فنية خاصه دون اعتبار لاصحاب هذه المهارات , لان فئات الناس هنا متغيرة مثل ممارسي الطب والهندسه و غيرها

ب- خصوصيات طبقية : وهي توجد بين ابناء الطبقة الواحدة , وغالبا يصعب الانتقال بينها نظرا لتحكم صفة الطبقية في المجتمعات

3- متغيرات : هي عناصر ثقافيه لاتنتمي للعموميات ولا الخصوصيات هي حديثه اما لانها مبتكرة نتيجة الظروف او انها نتيجة غزو ثقافي او نتيجة اتصال بين ثقافتين .

ويتحكم في مدي بقائها دقة قيامها بوظائفها ومدي كفائتها في دورها , وهي تظل متغيرات حتي تستقر وتصبح اما من العموميات او الخصوصيات .

طب كل الكلام اللي فات ده جميل فين المشكله !!

المشكله هنا في مواجهة الهوية الثقافيه للعولمة وخصوصا في الدول الفقيرة والناميه والتي ننتمي اليها

لانه مستحيل اتحاد الهويات القومية لعمل هوية عالمية , والصعوبة هنا تكمن في التناقضات الكبيرة بين هوية كل قومية وغيرها

وبالتالي ينتج عن العولمة وانفتاح الثقافات علي بعضها ثلاث احتمالات :

الاول : التصادم والصراع :

اي صراع الهوية القومية ضد العولمة في تثبيتها وعدم طغيان الثقافات الاخري عليها وخصوصا التي تمتلك تراثا ثقافيا تضرب جذوره في اعماق التاريخ .

الثاني : الاكتساح والانسحاق :

ويقصد به تفكك وضياع الهوية الثقافية للدولة الاضعف امام المد العولمي الشديد , حيث انها صورة من صور هيمنة الاقوي علي الاضعف ومن هنا ظهرت "التفتتية الثقافية " والتي من مظاهرها :

- الغزو الثقافي لاذابة الثقافات الاخري

- الاتفاقات الدولية المجحفة للدول النامية ولمصلحة الدول الكبري مثل اتفاقية الجات مثلا

- الشركات العملاقة عابرة القارات وسيطرتها الاقتصادية

- التحكم في البث الاعلامي والاقمار الصناعية

ووهذا علي سبيل المثال لا الحصر

الثالث: الحوار والتفاعل :

حيث تقبل كل طرف للاخر مما يؤدي لوجود نوع من التفاعل وتسمي هذه الحالة بـ " العولمة الديموقراطية"

ولتحقيق هذا الاحتمال يجب ايجاد نظام عالمي اكثر عدلا يكون العالم الثالث طرف مشارك فيه

وبالطبع الاحتمال الثاني هو الاكثر واقعية وحدوث

بمعني ان الواقع الحادث الان هو طمس لثقافتنا بشكل مقصود او غير مقصود

اي مجتمع اذا طمست هويته اصبح بلا مضمون بلاشكل بلا اي تميز بلا ثقافة خاصة به

ويمكن بكل سهولة ان نلاحظ مظاهر هيمنة الثقافة الغربية بما انها الاقوي ( وخصوصا الثقافة الامريكية ) من خلال وسائل الاعلام وخصوصا الاعلانات التي تبث افكار غريبة علي المجتمعات العربية والاسلامية وتقبلها بمنتهي السهولة بداعي التحضر والتقدم

فالتقدم الذي يسعي اليه تقدم ظاهري دون اي مضمون ايجابي .

*فمن مخاطر العولمة التي يجب ان نضعها امامنا ونعيها تماما :

- تراجع اللغة العربية في مقابل اللغات الاخري . ومن اكبر اسباب تراجعها ان اللغه الاساسية لاستخدام الانترنت هي اللغه الانجليزية واستخدام اغلب الشباب العربي هذه الخدمة باللغة الانجليزية دون العربية اضافة الي ذلك انتشار مدارس اللغات والاعلانات التي تعتمد علي اللغه الانجليزية حتي التعليم العملي في الجامعات يعتمد علي اللغه الانجليزية وليس العربية

وكل هذه المظاهر ادت الي النظرة الدونية للغة العربية وانتقاص قيمتها ليس في المجتمعات الغربية بل في المجتمعات العربية نفسها !!

- زيادة الشعور بالاغتراب . حيث يعيش ابناء المجتمع ثقافتين متعارضتين في وقت واحد مما يؤدي لاغتراب ثقافي ناتج عن " استعمار للفكر والوجدان " وهذا له اثاره السلبية مثل تشويه العقيدة والتذمر والفوضي والاحساس بالدونية .

- إضعاف الانتماء الوطني . حيث يري الكل الدولة العظمي الاقوي سياسيا وثقافيا وحضاريا واقتصاديا حتي اصبحت هي الحلم الذي يسعي اليه الجميع حتي اصبحت العولمة هي الأمركة فرأينا الكثير من الشباب يرتدون العلم الامريكي علي الملابس واغطية الراس , وانتشار ثقافة الوجبات السريعة خصوصا لشركات امريكة حتي سميت هذه الظاهرة بالكنتكة والكوكلة والجكسنة (نسبة لمايكل جاكسون )

كما ان العولمة نجحت في التغلب علي سيادة الدوله عن طريق الشركات عابرة القارات وفرض ارادتها التي قد تعلي علي ارادة الدولة نفسها وساعد في ذلك دخول رجال الاعمال ودفاعهم عن مصالحهم الفردية بصرف النظر عن مصالح المجتمع نفسه .

- تنامي العنف والتطرف وتهديد امن المجتمع . وذلك عن طريق :

*صناعة الفيديو والسينما والبرامج الالكترونية وخاصة التسلية منها

*تحويل النت من وسيلة اتصال الي اداة للجريمة علي يد بعض المحترفين

*تطور التكنولوجيا وبالتالي توفير العمالة وزيادة البطالة والعنف والتطرف

- تنمية النزعة الاستهلاكية وشراء السلع . وتستخدمها الدول الكبري للقضاء علي القدرة الانتاجية للدول النامية ويتضح ذلك جليا في سلوك الافراد في شراء سلع ليس لها اهمية ولا استخدام , ونتج عن ذلك الرغبة في الربح السريح بأقل مجهود والتهرب الضريبي والغش والنصب .

- التسطيح الفكري والقضاء علي الابداع . حيث تعمل العولمة علي التنميط وهي كارثة فنجد التكنولوجيا تعمل علي توفير السلع المادية والقافية جاهزة مما يؤدي لتعطيل العقل عن الابداع وتحويله لعقل مجرد يعتمد علي التلقين .

- تزايد حدة الفروق الطبقية . حيث الفوارق الكبيرة فظهرت المجتمعات المنتجة والمهمشه , الانسان السوبر والمسترخص , الغني الفاحش والفقير المدقع . ولاشك ان تزايد حدة هذه الفوارق تهدد الامن الاجتماعي .

- الترويج لانماط معينة الاجتماعية والاسرية والجنسية . حيث تسعي العولمة بفرض قيم علي انها قيم عالمية , فهي تسعي الي تهميش الثقافات المحلية والقضاء عليها من خلال عمليات التجنيس الثقافي .

بالفعل نحن في ازمة ان لم نعي جيدا ونحاول التمسك بثقافتنا مع التطلع الي الحداثه في نفس الوقت لنواكب التطورات فالعالم يشهد سهولة انسياب المواد الاتصالية والمعرفية بشكل لا يعرف حدود او حواجز وانتهي عهد استقلال نظم المعلومات عن نظم الاتصال .

ولمواجة الموقف يجب التأكيد علي الهوية العربية الاسلامية مع الانفتاح علي الثقافات الاخري بحيث تكون علاقه تبادليه او الند بالند ( خد وهات مش هات وهات بس ) ولن يحدث هذا الا بشعورنا بأهمية حضارتنا وتاريخنا وثقافتنا وان عوامل الضعف اللي بتمر بها الان بسبب اهمالنا لها

فبتمسكنا بدينا وقوميتنا وعاداتنا الصحيحه ( ونركز علي الصحيحة جدا ) وإلغاء العادات الخاطئة والتعصب الاعمي والاستفادة من كل جديد بما يتماشي مع تقاليدنا واسلامنا .

والابتعاد عن الهلث وراء كل ما يصدر عن الغرب سواء كان مناسب او غير مناسب لمجرد انه وارد بلاد التقدم

لابد ان تحدث العولمة في مضمون لان غير ذلك هو صورة من صورة الاستعمار الاكيد ..

الموت وأشكال اخري

ماهو الموت ؟!

هل هو الرحيل الي العالم الاخر !!

فالعديد ممن عرفناهم ورحلوا عن عالمنا مازالوا يعيشون بداخلنا

وزكراهم خالدة داخل النفس والوجدان .





اذن ماهو الموت



هل الحي الميت يدخل في عداد الاموات !!



هناك الحي ميت الضمير

وهناك الحي ميت المشاعر

والحي ميت الانسانيه

والحي بلا زاكرة

والحي بلا دين

والحي بلا بصيرة

والحي بلا قلب







وهناك الحي بكل ماسبق معا



السؤال هنا ...



هل يعتبر ذلك الحي حياُ!!



في انتظار الاجابه





رسالة :



الي كل من اعرفهم و رحلوا عن عالمي ..

لم انساكم ابدا , فأنتم نقوش حفرت في الزاكرة

سامحوني ان كان هناك تقصير

اعياني كثرة الفراق فلم اعد اتحمله

اشتاق لرؤياكم جميعا

ادعو الله لكم بالعفو والمغفرة

كان ياما كان ياسادة ياكرام

كان يامكان كان فيه بلد كده هناك فرحانة بنفسها وبتغني لنفسها والشعب مصدق وبيغني معاها

ويوم ورا يوم الشعب اتفرط

واتشحطط

واتفرق

واتقرف واتمرمط

بس البلد لسه بتغني بالسيادة والكرامة

ويوم ورا يوم

الشعب انكوي من الغلا

والضرايب والغش والبلا

غير الحوادث والكوارث

ايشي اتحرق واللي غرق واللي اتهدم

لكن علي مين الوطن فوق الجميع هنغني برضه للبلد

اصل الاغاني لسه ممكنه

ويوم ورايوم

ضاع العلام

ضاع الكرامة وضاع الولد

مالاخر ضاع الكلام

مبقاش فيه غير الخرس

وشوية جهل وهبل

ويوم ورا يوم مفيش

غير الرقص والتطبيل

وفجاه الرقاصه بئت مثقفه

والممثل اصبح سياسي

والعدو لقيناه حبيب

والصديق اصبح قاتل

والضعيف طلع ذئب

ولما دولا موتوا ديكهما

عملوا نفسهم مش واخدين بالهم

وفي الاخر قالوا غلطة مش مقصودة

بس لما دولاهما موتوا ديكهو

قامت الدنيا وشعارات بالكرامة والسيادة والعظامة والفخامة

مع ان ديكهما مضروبين بالجزمة من زمان من كوووووولهما

الله

واما هو لسه فيه كرامة وسيادة

فين حقنا ماللي حصل هناك لما انضربوا وعيطوا زي البنات

هو لو لسه فيه بصحيح

يصرفوا تعويض 100 جنيه عاللي حصل في رشيد !!

واللي محروقين عليه وبيستغلوا حادثته الشهيد تعويضه 5000 جنيه وتم التنويه عنه باعلان مش اقل من 30 الف جنيه !!

طب هو فين مدعوء اسماعيل

ونواب القروض

انت بتقول نواب !

ده موال تاني

تزوير انتخابات ومصاريف بالملايين وفي الاخر

ضرب وشتيمة وقلة قيمة عالهوا واللي مايشتري يتفرج

انت بتقول يتفرج

اتفرجت علي احتجاج شارع الهرم

لما اتلموا عند الزعيم المحترم

ايشي بتمثل وايشي بيرقص واللي بيغني

بس في النهاية كله تمثيل محترم

ماهي كده

بلد فيها كل ماتقلع تُحترم

واه لو لبست واتغطيت

هتتقلب ارهابي وتتنفي

اه انتو فاكرينها لعبه

فيه امن وامان مش كوسه هي ولابتنجان

كوسه بتقولوا كوسه

فكرتوني

دي فوضي

دي مشكله

اهي دي الكارثه المعضلة

بس لا علي مين

مش هنسكت مش هنطاطي

مش بنخاف مالصوت العالي

هنعتصم

هنحتج وهنثور

كفايانا سكوت

لازم ناخد موقف ويكون قاطع مانع بات

ازاي يمنعوا عنا عرض الماتشات !!!!!!!!!