كان يامكان كان فيه بلد كده هناك فرحانة بنفسها وبتغني لنفسها والشعب مصدق وبيغني معاها
ويوم ورا يوم الشعب اتفرط
واتشحطط
واتفرق
واتقرف واتمرمط
بس البلد لسه بتغني بالسيادة والكرامة
ويوم ورا يوم
الشعب انكوي من الغلا
والضرايب والغش والبلا
غير الحوادث والكوارث
ايشي اتحرق واللي غرق واللي اتهدم
لكن علي مين الوطن فوق الجميع هنغني برضه للبلد
اصل الاغاني لسه ممكنه
ويوم ورايوم
ضاع العلام
ضاع الكرامة وضاع الولد
مالاخر ضاع الكلام
مبقاش فيه غير الخرس
وشوية جهل وهبل
ويوم ورا يوم مفيش
غير الرقص والتطبيل
وفجاه الرقاصه بئت مثقفه
والممثل اصبح سياسي
والعدو لقيناه حبيب
والصديق اصبح قاتل
والضعيف طلع ذئب
ولما دولا موتوا ديكهما
عملوا نفسهم مش واخدين بالهم
وفي الاخر قالوا غلطة مش مقصودة
بس لما دولاهما موتوا ديكهو
قامت الدنيا وشعارات بالكرامة والسيادة والعظامة والفخامة
مع ان ديكهما مضروبين بالجزمة من زمان من كوووووولهما
الله
واما هو لسه فيه كرامة وسيادة
فين حقنا ماللي حصل هناك لما انضربوا وعيطوا زي البنات
هو لو لسه فيه بصحيح
يصرفوا تعويض 100 جنيه عاللي حصل في رشيد !!
واللي محروقين عليه وبيستغلوا حادثته الشهيد تعويضه 5000 جنيه وتم التنويه عنه باعلان مش اقل من 30 الف جنيه !!
طب هو فين مدعوء اسماعيل
ونواب القروض
انت بتقول نواب !
ده موال تاني
تزوير انتخابات ومصاريف بالملايين وفي الاخر
ضرب وشتيمة وقلة قيمة عالهوا واللي مايشتري يتفرج
انت بتقول يتفرج
اتفرجت علي احتجاج شارع الهرم
لما اتلموا عند الزعيم المحترم
ايشي بتمثل وايشي بيرقص واللي بيغني
بس في النهاية كله تمثيل محترم
ماهي كده
بلد فيها كل ماتقلع تُحترم
واه لو لبست واتغطيت
هتتقلب ارهابي وتتنفي
اه انتو فاكرينها لعبه
فيه امن وامان مش كوسه هي ولابتنجان
كوسه بتقولوا كوسه
فكرتوني
دي فوضي
دي مشكله
اهي دي الكارثه المعضلة
بس لا علي مين
مش هنسكت مش هنطاطي
مش بنخاف مالصوت العالي
هنعتصم
هنحتج وهنثور
كفايانا سكوت
لازم ناخد موقف ويكون قاطع مانع بات
ازاي يمنعوا عنا عرض الماتشات !!!!!!!!!
المشاركات
6 التعليقات:
الله الله يا مستكة
قوية وفيها دروس كتير كلماتك دي ..بس الظاهر فعلا محتاجين نوقف زراعة الكوسة ...ربي يكرمك
رائعة وجميلة وساخرة ..
بتجمع كل حاجة بجد
وقلتلك راى فيها قبل كده على الفيس ..
منتظرة حاجات تانية ان شاء الله ..
دمتِ بخير ..
كلمات من نور
نورتيني بجد
شاكره جدا مرورك الكريم
بخصوص الكوسه الظاهر انهابئت زي ورد النيل
صعب السيطرة عليها
لوجي
ربنا مايحرمني من زياراتك ابدا يارب
منوره منوره منوره
تلاته منوره
جميلة قوي ، ويارب فعلاً كلنا نفوق وننتبه لنفسينا وندافع عن حقوقنا ونبطل السلبية عشان حال البلد دي يتقدم وزي ما بندافع عن حقوقنا البسيطة ندافع عن حقوقنا الكبيرة والهامة واهمها .. حقنــا في الحياة
د/ شيكو
اهلا بيك
اسعدني مرورك
بس ازاي هندافع عن حقوقنا واحنا كل واحد فينا بيقول نفسي نفسي !!!
إرسال تعليق