الي كل المقبلين علي الخطبة تعالو نتكلم سوا
فيه اداب المفروض نراعيها اثناء اختيار شريك العمر
واخطاء كتير بنقع فيها بدون قصد ممكن تسبب حرج او جرح الاخرين
طيب زي ايه يا مستكة ؟
اقولكم انا
في الاول هوجه كلامي للشباب ( لان الشباب فرص الاختيار اودامهم بتكون اوسع من البنات )
فيه نوعين من الشباب :
- نوع يسعي لشريكة العمر بنفسه وبدون وسيط
- ونوع تاني يلجأ للوسيط سواء كان الوسيط ده الام او الاخت او صديق او حتي الخاطبة
النوع الاول : بيعتمد علي نفسه لان محدش عارف هو عايز ايه غيره , بس احيانا ممكن يتسرع في الاختيار
اما انه بيختار غلط نتيجة عدم الخبرة , او انه بيختار صح بس الاهل بتعترض علي الاختيار ده لذلك انا برجو كل شاب بيحاول يوصل للبنت اللي عايز يرتبط بيها احساسه ويعرف رأيها , قبل ما يقرب ويلمح
يفكر كويس هي مناسبه ليه بظروفها ولا لأ؟
ولو مناسبه ممكن اهله يعترضوا عليها ولا هيوافقو ؟
ولو اعترضوا هو ممكن ياثر عليهم ولا لا ؟
عشان ساعتها هيخسروا كتير في الموضوع
النوع التاني : وده اللي بيلجأ لوسيط في اختيار او ترشيح شريكة حياته ,
والنوع ده برجوه يكون واضح في طلباته وتكون محدده وصريحة , ده حقه ومحدش يقدر يناقشه فيه لان محدش هيعيش حياته .
شوف انت تتمني ايه في الانسانه اللي تحب تكمل حياتك معاها ..
مواصفاتها الشكليه (حقه ومحدش يقول الجمال جمال الروح دي مش قاعده عند كل الناس )
تعليمها - ثقافتها - نسبة التزامها - عملها - ....الخ
وده هيوفر كتير علي الوسيط انه يرشح حد قريب من المواصفات دي
وطبعا مش هتلاقي كل حاجه في شخص واحد يعني هيكون فيه شوية تنازلات بس فيه حاجات ممكن تتنازل عنها بيعوضها حاجات تانيه وفيه حاجات مينفعش التنازل عنها
وبقول تكون محدد في طلباتك عشان مش تقول عايز عروسه وبس , ولما الوسيط يكلم بنات الناس ويوصل بينهم مترجعش تقول لا انا كنت عايز كذا وكذا
علي فكرة انا مش بتكلم في مسألة القبول لان دي حاجة مفروغ منها ومينفعش نتكلم فيها .
* بالنسبه للرؤية الشرعيه :
- ياريت تكون في قمة شياكتك واناقتك لان الانطباع الاول بيكون له عامل كبير
-لو هتزوروا الناس في بيتهم يكون جميل جدا لو اخدتم معاكم حاجة بسيطه وانتو داخلين عليهم دي حاجة زوقيه , ناس بتفكر البنات اللي بتعلق علي النقطة دي انهم ماديين او حاجه بالعكس انت لو اخدت معاك جاتوه او شيكولاته او اي شيء دي حاجه تدل علي الزوق والكرم وبتعبر عن شخصيتك في الاول والاخر .
وفيه ناس تفضل انها تشوف البنت بره البيت مع حد من محارمها عشان الاحراج و اول مره يشوفها واحتمال ميحصلش توفيق . لوكده حاول انت اللي تطلب المشروبات وتحاسب عليها زوقيا برضه
- وياريت لو محستش بقبول مالوش لزوم تطول في الجلسه ممكن تستاذن باي حجة , مش تعد معاهم تلات ساعات وتمشي بالعافيه وفي الاخر تقول مفيش نصيب .
واهم حاجة لو حسيت انه مفيش قبول قبل او بعد الاستخارة متقلش سبب عدم الارتياح ( دمها واقف - رغاية - طوبة مابتنطقش- طويلة - قصيرة ...الخ ) ياريت تحتفظ بالاسباب لنفسك واكتفي بس بكلمة مفيش نصيب عشان حاجة زي دي بتتعب البنت جدا .
بالنسبه للبنات :
- نفس الشيء فيه بنات شايفه ان جواز الصالونات ده عفي عليه الزمن وانها لازم تختار شريك حياتها وتكون عارفاه قبل مايدخل البيت .
اهم حاجة هنا لازم تاخد بالها كويس من اختيارها ومش تختار بعواطفها بس لازم تشرك عقلها في الموضوع , عشان متتعلقش بقصة ممكن جدا تنتهي برفض الاهل او عدم مناسبة ظروف كلا الطرفين , واكيد ده بيكون حاجة صعبة عليها .
- وفيه البنات اللي بتقبل بجواز الصالونات وترشيحات الاهل .
الرؤية الشرعية :
بتكون سبب في قلق وتوتر كبير للبنت لذلك بنصحها
- خليكي واثقه من نفسك
- متحوليش تكوني غير نفسك , لا تدعي الهدوء في حين انك متكلمة ولا تدعي التكلم وانتي هادية خليكي طبيعية جدا لان احيانا التصنع بيزيد الوضع سوء .
- اهتمي بمظهرك وخليكي في ابهي صورك لان الانطباع الاول له اثر كبير .
- بلاش ميك اب اوفر ,عشان الشاب اللي جاي يشوفك ده من حقه يشوفك علي طبيعتك مش لينسيز ورموش ...الخ
وبرضه مش بقولك تهملي ماهو الراجل مش جاي يقابل واحد صاحبه , يعني حطي حاجه بسيطة خالص عشان لو حبايه كده تداريها او في ارهاق تحت العيون حاجة مجرد انها تداري عيب في البشره مؤقت مش تخدع اللي جاي يشوفك .
نفس الشيء بالنسبه للملابس يعني بلاش ملابس فيها تكلف . خليكي بسيطة ورقيقه الرقه من طبع البنات .
- لما تشوفي الشاب اللي متقدملك بلاش تتسرعي في القرار بالرفض او القبول تأني واستخيري واعرفي كويس ان مش كل حاجه بنتمناها بنلاقيها , واعرفي برضه انه الشاب اللي لسه في بداية حياته دخله مش زي بابا اللي بقاله تلاتين سنه بيشتغل .
- وبلاش تبصي لبنت عمك وخالك كل واحده وبيكون لها نصيبها .
- واوعي تحكمي علي انسان من خلال شكله بس , اهم حاجه الاخلاق والشخصيه .
وطبعا القبول اهم حاجه .. ولو محستيش بقبول بلاش ترددي العيوب اللي قررتي من خلالها الرفض إكتفي بانه مفيش نصيب عشان متجرحيش الطرف التاني .
وفيه سؤال مهم جدا لازم كل واحد وواحده يجاوب عليه قبل الخطوة دي
انت عايز شريك حياتك شبهك ولا يكملك ؟!!
لازم يكون كل واحد عارف هو عايز ايه بالظبط
وربنا يوفق البنات والشباب يارب
في انتظار رأيكم
المشاركات
