١٠:١٣ م

I have a message



السلام عليكم ورحمة الله وبركاته
عارفين لما تكونوا عايشين في الحياه حاسين بالوحده
عارفين احساس انك مش فارق مع اي حد
موجود زي مش موجود
عارفين يعني ايه انسان شفاف
مش جايه من صفة نقاؤه لأ شفاف يعني هوا
محدش شايفه ولاحاسس بيه مجرد شوية هوا
ايوة هي الاحاسيس الغريبة الملخبطة دي
طيب
عارفين احساس لما تكونوا ماشيين في صحرا صفرااااااااء جردااااااء
وفجأة تلاقوا وردة بلدي لونها احمر وريحتها فواحه
لما تلاقي بقعة ضوء وسط سواد كتير
ايه التشبيهات الغريبة دي !
وعلاقتها ايه باللي هقوله !!!
معرفش
بس ده احساسي وقت ماجتلي الرساله دي
فرحت بيها فرح ربي وحده اللي يعلمه

بنت اختي ربنا يخليهالي ويبارك فيها يارب

صممت الكارت باديها وكتبته من نفسها

واهدته ليا

انا

من غير مناسبة

ولا سبب

ولا مصلحة

ولا نفاق

ولا اييييييييي حاجه في الدنيا

غير بس انها بتحبني

طيب اعوز ايه بعد كده

اما قلب جميل زي ده يحبني باخلاص وبجد

الدنيا ومافيها

انا فرحانة اوي

10 التعليقات:

ghorBty يقول...

ربنا يسعدك دوما

زي ما قلت

موقف يكاد يكون صغير بيكون اد ايه تاثيره علي النفس وعلي الشخص

وهو دا احساس الانسان اقل كلمه او فعل ممكن يرضيه

واقل كلمه او فعل ممكن ازاي ترسم في قلبه الم وحزن

امنية يقول...

يـاه بجد
رغم اني معرفتش اشوف الكلام بس بتبقى حاجات جميلة اوي خاصة من الأطفال
ماما شايلة كروت وجوابات كتيرة كنت بعملهالها وانا صغيرة
احتفظي بيه يا مستوكة كويس
ربنا ما يحرمكم منها

وبعدين هو انا مش وردة بلدي ولا ايه:(
مقصرة عارفة والله بس الامتحانات على الأبواب
في بالي يا مساتيكو والله
ربنا يحبك ويكرمك

كلمات من نور يقول...

يا جماله هذا الحب الصادق ..ما شاء الله لا قوة إلا بالله ..أحلى ما في الدنيا حب الأطفال وتعبيرهم عن هذا الحب ..ربي يحبب خلقه فيكي صغارا وكبارا.

salma mohamed يقول...

ربنا يخليكوا لبعض يا روني,
والله أنا كمان من أكتر الحاجات السعيدة في حياتي هو وجود أولاد أخويا فيها,
ومن أسعد الأوقات اللي بقضيها معاهم وتعبيراتهم البريئة بتفرحني اوي,
والله الاطفال دول احنا بنتعلم منهم حاجات كتير (:

غير معرف يقول...

الله فعلا علي المشاعر لما تخرج من قلب صافي نقي لسه ما اتلوثش بزماننا و النفاق اللي فيه !
ربنا يحفظها لأمها و لخالتها يا رب و يكرمك يا اخت مستكة و تتطلعي من شعور الوحدة ده لأنه شعور قاتل بجد ..
بيقتل كل المعاني الحلوة اللي ممكن تكون موجودة في دنيتنا و بيصحي بس مع حاجات جميلة زي اللي بنت اختك عملتها ديه ..

زائر :)

مستكه يقول...

غربتي :

ربنا يخليكي يارب ويسعد ايامك

فعلا اقل كلمة شكر او تقدير بتسعد جدا بس مش عارفه ليه بنبخل علي بعض بيها

كويس ان الاطفال لسه مفهموش اللعبه

اهو نلاقي حاجه تطري علينا الحياة شوية ^_^

مستكه يقول...

منمن انتي اجمل وردة بلدي

ربنا يعينك ياحبيبتي

عارفه يا موني الحاجات دي بتكون جميلة اوي وبتفرق مع الواحد

كمان زنزونه عسولة حبيبة قلبي ما انتي عارفاها بصي كاتبالي ايه :

انا بحب خالتو وبحب تيتا وبحب جدو
انت احلا واحده في الدونيا يا خالتو

من زينة

البنت شايفاني احلي واحدة في الدنيا مرضتش اصدمها واعرفها الحقيقة المرة قلت اسيبها وهي هتكتشفها بنفسها
ههههههههههههههههههه

مستكه يقول...

كلمات من نور :

اللهم امين

دعوتك جميلة اوي ربي يعزك ويكون لكي مثلها يارب

تعرفي بعتبره اصفي حب بجد هو حب الاطفال لانه بيكون حب نقي لا لتسلية ولا لمصلحة

ربنا ما يحرمني من القلوب النقية يارب

مستكه يقول...

سلمي :

ربنا يخليلك اولاد اخوكي يارب ويشفيلك اخوكي

وعقبال يارب ماتفرحي باولادك في المستقبل ان شاء الله

البيت اللي مش فيه اطفال بيكون ناقصه كتير في الحقيقه

ربنا ما يحرمنا جميعا من نعمة الطفولة

مستكه يقول...

زائر :

زائرة ولا زائر ! عموما صفة المذكر تنفع للاتنين ^_^

عندك حق ان القلوب الصغيرة لسه صافية ربنا يستر عليها من التلوين ,اصل اليومين دول كله بأه ملون .



اللهم امين يارب يحفظها ,بس مش معاك ان الوحدة ممكن تقتل معاني جميلة بالعكس دي بتخلينا اكثر حساسية وياثر فينا ابسط الامور

زائر :

شكرا للمرور الكريم ياريت يتكرر بس المرة الجاية يكون باسمك عشان نضمن الزيارة ^_^