١٠:٥٢ م

يعني ايه كلمة وطن ؟!

يعني ايه كلمة وطن ..
يعني ارض حدود مكان
و لا حالة م الشجن
ولا ايه ولا ايه ولا ايه
شاي بالحليب على قهوة في الضاهر
هناك نسمة عصاري السيدة و دير الملاك
يعني ايه كلمة وطن ..
نشع الرطوبة في الجدار
ولا شمس مغرقة برد النهار
و لا امك و لا اختك
و لا عساكر دفعتك و الرملة نار
يعني ايه كلمة وطن

يعني ريحة يعني صوت
ايام بتشبه بعضها وسنين تفوت

و اما نسافر و الحدود يفصل ما بينها الف ميل
بنسيب سنين الحب و العمر الجميل

ولا ايه ؟

ولا بناخد كل دول
هزة فرح او غيم هموم
و احنا بنحلم بالوصول
حتى في عرقنا في الهدوم

بتهزنا حالة شجن
هو ده معنى الوطن ...

4 التعليقات:

الفقيرة إلى الله أم البنات يقول...

تعرفى اول امبارح كنا بنعمل تعبير أنا ومريم عن الوطن
ما هو الوطن
وما هو فضل الوطن وكيف نرد للوطن حقه
استغربت من السؤال
وبدانا فى الكتابه
بس الأكيد مريم كان كل همها تخلص موضوع التعبيير علشان تلعب من صحبتها
وموصلهاش معنى الوطن

صعب قوى حد يفهمه دلوقت لان الوطن دلوقت بقى قاسى قسوة الاعداء

مستكه يقول...

صعب اوي تحسي الوطن وهو مش حاسس بيكي

صعب جدا تلاقي مفردات توصفه وهو نفسه بيطردك

بس تعرفي حاجة غريبه جدا لاحظتها

كل ما اشوف كلمة وطن علي طول يجي في بالي صورة ماما

عارفه انه فرق بين الوطن والام

بس حقيقي دايما بحسها وطني وعمري ماحسيت بالامان الا في حضنها

ويوم ماتقابلني مشكله وافزع منها بجري عليها حتي لو عارفه انها مش بايدها تحلها

مجرد وجودي معاها ده في حد ذاته قمة الامان

مش كده تبقي وطني برضه

بس الوطن الصغير

عقبال يارب لما يكون الوطن الكبير كده ولو اني عارفه انه صعب

كلمات من نور يقول...

الله على كلامك يا مستكة

ربي يخليلك وطنك الأصغر ويعدل حال وطنك الأكبر و أمة محمد يارب

مستكه يقول...

اهلا بيكي يا كلمات

اللهم امين لدعوتك

انا حاسه اني عارفاكي

مش كده برضه !!