١١:٥٩ ص

سمك على الطريقة الفلبينيه

السلام عليكم ورحمة الله وبركاته

واخيرا بعد طول غياب عدت لمدونتي حبيبتي

وجايبلكم اكله لذيذه جدا وسهله جدا جدا


سمك بالطريقه الفليبينيه مع الرز بالجمبري


اولا : طريقة السمك ...

المكونات :
سمك فليه - بصله مفرومه - ثوم - 2ملعقة خل - 2ملعقة صويا صوص
2ملعقة نشا - فلفل اخضر - ملعقة جنزبيل مفروم - ملعقة صغيره سكر -فلفل اسود


الطريقه :
يوضع الملح والفلفل الاسود علي السمك ثم يوضع السمك في الدقيق ويحمر في الزيت
(ده بالنسبه للسمك الفليه )

بالنسبه للصوص :

يوضع قليل من الزيت في طاسه وضع فيه الثوم المفروم +فلفل الوان (اخضر واصفر
واحمر مقطع مكعبات صغيره )+ البصله المفرومه + الجنزبيل +رشة سكر
+ملح وفلفل +الصويا +خل + ملعقتين نشا ليصبح القوام تقيل
وبعد ذلك توضع شرائح السمك المقلي في طبق التقديم
ويوضع عليه الصوص ليقدم مع الرز بالجمبري




الرز بالجمبري

الطريقه :

بصل مفروم +فلفل اخضر +كسبره ناشفه +كمون +ملح وفلفل +جمبري
يشوح البصل في الزيت حتي يصبح لونها احمر تماما (بدون ان تحترق لانها لو احترقت
طعم الرز بيكون مر ) ثم نضع عليها كمية الماء التي تناسب كمية الرز المستخدم ونضع
عليها الملح والفلفل والكمون والكسبره وممكن ثوم مفري وشطه حسب الرغبه
ثم نضع 2قرن فلفل اخضر مقطع مكعبات صغيره ثم نضع في حدود نصف كيلو جمبري
وعندما تصل للغليان يوضع الرز ويترك ليستوي بالطريقه التقليديه


ويقدم معها السلطه الخضره


لتصبح وجبه شهيه ولذيييييذه


وبالهنا والشفا

14 التعليقات:

الفقيرة إلى الله أم البنات يقول...

التعليقات:



إيه الحركات الفليبنيه دى
خلى بالك وائل هيدخل وانت حرة
اكيد هايديها تعليقات
وانا مليش دعوة

مستكه تسلم إيد وعينك
متجرب ولا منقول ولا صناعة المدن الجديدة؟

مستكه يقول...

ام البنات

نفسي ازغرط لسببين مهمين جدا

اولا انك زرتيني

ثانيا انه اخيرا حد حن عليا ورد علي البوست

(حاسه ان في حد واقف علي الباب بيقول للناس احذرو البوست فيه سم قاتل )^_^

بس ايه رايك في النظام الفلبيني ده حاجه كده محصلتش بس متاخدوش عليها يعني

طنط كل مره تساليني السؤال ده للجرجادي انا مش وش ذلك

بعرف اطبخ ياناس

مش بحط حاجه مش متجربه وواكله منها هنا عشان اتكلم بثقه

والمره الجايه هجيب اقرار فيه امضة اتنين ميتين من خمسه وعشرين سنه

عشان السلامه والامن

^_^

منوراني والله

مش هشوفك قريب بئه هه

salma mohamed يقول...

لاستاذة مستكة
ياه انا نفسي اوي في الجمبري بالرز,كانت ماماتي الله يرحمها بتعمله حلو اوي وكل اللي يذوقه يتجنن عليه,بس بصراحة مش فاكرة كانت بتعمله ازاي,
نبقى نجرب الطريقة دي,اصل الجمبري ده الاكلة المفضلة عندي

لوجين أبو الدهب يقول...

لصراحة ما شاء الله ..
منظره يخلى اللى شبعان يجوع .. :D

الناس كلها بتحب تبقى الاكلة بالصور الا انا .. :D

جميلة يامستكة ما شاء الله ..

انا فى حاجة للحاجات دى سنة اولى مطبخ بقى ..

ان شاء الله ابقى اجربها ..

جزاكِ الله خير حبيبتى

مستكه يقول...

سلمي الحبيبه منوره البوست يا جميل

انا مبسوطه اوي ان الاكله عجبتك

وعلي فكره هو الرز بالجمبري طريقته سهله خالص بس اهم حاجه في الرز انك تقدري الميه تبع لكمية الرز عشان يطلع مظبوط

ومش مشكله اما تعملي حاجه وتطلع مش مظبوطه هتعرفي العيب فين والمره الجايه تظبطيه

حبيبتي ربنا يعزك يارب ويرحم والدتك

يلا بئه شدي حيلك وورينا الشطاره

مستكه يقول...

لووووجين

ايوه كده يابنتي طلي علينا علي طول بتوحشينا والله

بجد عجبتك الاكله

وبعدين ايه سنه اولي دي لا احنا بنات جدعان اوي

انا قلت هتيجي تعدلي عليا انتو اصحاب السي فود كله

علي فكره الاكل سهل جدا مفيش اسهل منه بس عايز علي طول تجارب عشان تبقي استاذه ورئيسة قسم ان شاء الله

ورده ورده ورده

ghorBty .. يقول...

ما شاء الله

يسلم ايدك

ان شاء الله نجربها وندعيلك

مدونتك حلوة ولذيذه

غربتي

لوجين أبو الدهب يقول...

ستكة حبيبتى ..

وانا والله باجى المدونة مخصوص علشان انتى بتوحشينى على طول واشوف اسمك واشوف موضوعاتك الجميلة ..

استشارة معلش على السريع ..

انا عندى كمية طماطم كبيرة وخايفة تبوظ من الحر .. ازاى احفظها ؟؟

إنى أحبك فى الله

مستكه يقول...

غربتي

نورتي المدونه

اسعدني جدا مرورك

والحمد لله انها عجبتك واتمني تزوروني دايما

ومنتظراكي تقوليلي النتيجه

مستكه يقول...

لوجين وانا والله بسعد جدا بمرورك

ياريت متحرمينيش من زيارتك الدايمه

وربنا يديم بينا الود دايما يارب

بصي يا ست البنات بخصوص الطماطم عشان تحفظيها فيه طريقتين :

1- انك تعمليها صلصه بالطريقه التقليديه انك تعصريها في الخلاط وتصفيها وبعدين تسويها علي النار واما تبرد خالص تعبيها وتحفظيها في الفريزر

2- وفيه طريقه تانيه انك تغسلي الطماطم كويس وتحطيها سليمه في الفريزر لمدة يوم بعدها تطلعيها بتكون سهلة التقشير بسبب التجميد (يعني القشره بتطلع لوحدها بسهوله مجرد تشديها ) بعد كده اضربيها في الخلاط ومش هتحتاجي تصفيها وبعدين احفظيها في الفريزر تاني وكل ماتحتاجي هتلاقيها جاهزة


ملحوظه :

لسهولة الاستخدام ياريت تعبيها مثلا في اكياس التلاجه بالكميه المناسبه لكل طبخة حسب استخدامك بحيث يكون كل كيس علي اد طبختك

يارب اكون افدتك يا لوجين

وائل مصطفى يقول...

حاجه جميله بصراحه

خدى الوصفه دى اسهل

1- هات فليبينيه

2- قولها تعملك السمك اللى انت عايزة



ودة افضل من كل الهوسه دى يا اخت مستكه
15 فبراير, 2009 12:29 م
وائل مصطفى يقول...

يا طنط ام البنات .. منورانا كتير جداا والله

وحضرتك شايفه يعنى اختك مستكه بتعمل فينا ايه كل بوست تنزله

بس المرة دى الوصفه جميله .. الوصفه مش الفليبينيه عشان محدش يفهمنى صح :d

صور تحفه و وصفه حلوة واضح انها بذلت مجهود كبير



نعديها البوست دة ... بس لا منكن ابدا نعديها البوست اللى جاى

لوجين أبو الدهب يقول...

مستكة حبيبتى ..

جزاكِ الله خير ياغالية ..

انا ابتديت فى الطريقة التانية ..

وانتظرى المزيد من الاستشارات ..

إنى أحبك فى الله

Dr.Soha Adel يقول...

الله الله الله

انا بحب السمك جدااااااااااااااااا

الجمبري ماليش فيه :s الا لو مقلي بس هجربه الرز ده برده ممكن احبه فيه

تسلم ايديكي يا مستوكه

ما تيجي اسيب الطب و افتح انا و انتي ريستورااااااان

مستكه يقول...

بشمهندس وائل

اهلا وسهلا

الحمد لله انه اخيرا حاجه عجبتك

حتي لوكانت الفلبينيه ^_^

طنط اكيد معاكي رقم الحكومه خدي الاجراءات اللازمه

نياااهاهاها (وش شريييييير )

بجد حضرتك نورت البوست

وشكرا للاطراء والثناء ^_^
19 فبراير, 2009 07:59 م
مستكه يقول...

لجين ياقمر منوراني دايما

ربنا يكرمك ويعزك يارب

وانا تحت امرك في اي حاجه واهو نتعلم سوا

^_^